مرکز اطلاعات فلسطین کے مطابق حماس کے ترجمان ڈاکٹر سامی ابوزھری نے کہا کہ سعودی عرب کی جانب سے حماس کے وفد کے دورہ ایران پر احتجاج کے بارے میں جو خبریں سامنے آئی ہیں، ان میں کوئی صداقت نہیں۔ سعودی عرب کی جانب سے اس حوالے سے حماس کے ساتھ کوئی رابطہ نہیں کیا اور نہ ہی ہمیں یہ معلوم ہوا ہے کہ سعودی عرب کو اس دورے پر کوئی اعتراض ہے۔
ترجمان نے کہا کہ حماس تمام مسلمان اور عرب ممالک کے ساتھ یکساں برادرانہ تعلقات قائم رکھنے کی خواہاں ہے۔
خیال رہے کہ حال ہی میں حماس کے ایک اعلیٰ سطحی وفد نے ایران کا دورہ کیا تھا۔ اس دورے کے بعد غزہ کی پٹی میں حماس کے عسکری ونگ القسام بریگیڈ نے جماعت کے ستائیسویں یوم تاسیس کے حوالے سے ایک فوجی پریڈ کا اہتمام کیا جس میں حماس کے اسلحہ کی نمائش کی گئی تھی۔ اس موقع پر القسام بریگیڈ نے ایران کا خصوصی طورپر شکریہ ادا کیا تھا۔
حماس کے دورہ ایران کے بعد بعض عرب اخبارات نے یہ خبر دی تھی کہ اس دورے پر سعودی عرب نے سخت ناراضی کا اظہار کرتے حماس کی قیادت سے رابطہ کرکے اس پر احتجاج ریکارڈ کرایا ہے۔
بشکریہ:مرکزاطلاعات فلسطین