اسلامی تحریک مزاحمت "حماس” کے عسکری ونگ عزالدین القسام شہید بریگیڈ کے سپریم کمانڈر محمد خالد ابو الضیف نے غزہ کی پٹی کے قرب و جوار میں موجود یہودی کالونیوں کے آباد کاروں نو دوبارہ اپنے گھروں کی طرف لوٹنے کی اجازت دیتے ہوئے اسرائیلی ہوائی اڈوں میں آنے والی غیرملکی پروازوں کو دی گئی وارننگ بھی واپس لے لی ہے۔
مرکز اطلاعات فلسطین کے مطابق القسام بریگیڈ کی جانب سے جاری ایک بیان میں کہا گیا ہے کہ تنظیم کے کمانڈر محمد الضیف نے فلسطینی تنظیموں اور اسرائیل کے درمیان جنگ بندی معاہدے کے بعد صہیونیوں اور بن گوریون ہوائی اڈے کی پروازوں کو دی گئی وارننگ واپس لے لی ہے تاکہ غزہ کی پٹی میں جنگ بندی کو عملی شکل دی جاسکے۔
خیال رہے کہ چند روز پیشتر القسام بریگیڈ کے راکٹ حملوں کے بعد غزہ کی پٹی کے مضافات میں موجود یہودی کالونیوں کے آباد کار وہاں سے نکل گئے تھے جبکہ القسام نے بن گوریون ہوائی اڈے پر آمد ورفت کرنے والی غیرملکی پروازوں کو بھی حملوں کی وارننگ جاری کی تھی، جس کے بعد بن گوریون ہوائی اڈا ویران ہوگیا تھا۔