فلسطین نیوز کو موصول ہونے والی اطلاعات کے مطابق حماس کے دفتر سے جاری کردہ ایک بیان میں کہا گیا ہے کہ حماس کے سیاسی شعبے کے سربراہ اسماعیل ھنیہ نے عید کے موقع پر عرب لیگ کے سیکرٹری جنرل احمد ابو الغیط کو ٹیلیفون کیا۔ فون پر دونوں رہ نماؤں نے ایک دوسرے کو عید کی مبارک باد پیش کی۔ اس کے علاوہ فلسطین کی موجودہ صورت حال بالخصوص بیت المقدس اور مسجد اقصیٰ کو درپیش خطرات اور غزہ کی پٹی میں جاری بحران پر تبادلہ خیال کیا گیا۔
احمد ابو الغیط سے بات چیت میں حماس رہنما نے کہا کہ ان کی جماعت مصر سمیت تمام عرب اور مسلمان ممالک کے ساتھ اچھے برادرانہ اور اچھی ہم سائیگی کے اصول کے تحت تعلقات کو مستحکم کرنے پر یقین رکھتی ہے۔ انہوں نے کہا کہ حماس تنازع فلسطین کے حل کے لیے عرب لیگ اور کی طرف سے کی جانے والی مساعی کو قدر کی نگاہ سے دیکھتی ہے اور تزویراتی تعلقات کے قیام کی خواہاں ہے۔
دونوں رہنماؤں میں عرب ممالک کی موجودہ صورت حال اور عرب ریاستوں میں پائے جانے والے اختلافات پر بھی بات چیت کی گئی۔
قبل ازیں اسماعیل ھنیہ نے تیونس کے صدر القاید الباجی السبسی سے بھی ٹیلیفون پر بات چیت کی۔ حماس رہنما نے تیونسی صدر کو عیدالفطر کی مبارک باد پیش کی اور فلسطینی قوم کی حقوق کی حمایت جاری رکھنے پر تیونس کی حکومت کی پالیسیوں کو سراہا۔