(روز نامہ قدس ۔آن لائن خبر رساں ادارہ) صیہونی جارحیت کے خلاف بر سرپیکار فلسطینی مزاحمتی تنظیم حماس نے خلیجی ریاست بحرین کے وزیر خارجہ خالد بن احمد کے اس بیان کی شدید مذمت کی ہے جس میں انہوں نے اسرائیلی ریاست سے بہترین تعلقات کی خواہش کا اظہار کیا ہے۔
ذرائع کے مطابق حماس کی جانب سےجاری کردہ ایک بیان میں بحرینی وزیر خارجہ کے حالیہ بیان میں تشویش کا اظہار کیا گیا ہے جس میں انہوں نے اسرائیل سے خوشگوار تعلقات کی خواہش کا اظہار کیا ہے،حماس کے ترجمان کا یہ بھی کہنا تھا کہ ریاست بحرین نے یہ بیان دے کر نہ صرف غیرذمہ داری کا ثبوت دیا ہے بلکہ تمام مسلم امہ کی دل آزاری کا بھی سبب یہ بیان بنا ہے،انہوں نے کہا کہ لاکھوں فلسطینوں کے قاتل اسرائیل کے ساتھ خوش گوار تعلقات کا کوئی جواز نہیں ہو سکتا۔
خیال رہے کہ بحرینی وزیرخارجہ خالد بن احمد آل خلیفہ نے ایک بیان میں کہا ہے کہ اسرائیل خطے کی ایک ناقابل تردید حقیقت ہے۔ اس کے ساتھ تعلقات استوار کرنا امن کے لیے ضروری ہے، امت کے اصل دشمن اسرائیل کے ساتھ نہیں۔
حماس نے بحرینی حکومت پر زور دیا کہ وہ غیرذمہ دارانہ بیان واپس لے۔ جماعت کی طرف سے بحرینی عوام اور سیاسی جماعتوں پر بھی زور دیا کہ وہ اسرائیل کے ساتھ تعلقات استوار کرنے کی سازشوں کے خلاف فلسطینیوں کا ساتھ دیں۔