مرکز اطلاعات فلسطین کے مطابق سماجی رابطے کی ویب سائیٹ فیس بک پر پوسٹ کردہ ایک بیان میں عزت الرشق کا کہنا تھا کہ بیت المقدس میں اسرائیلی فوج کی فلسطینیوں کے خلاف مجرمانہ حرکات اور اقدامات دراصل اس خوف کا برملا اظہار ہیں جو صہیونی عسکری اور سیاسی قیادت کو فلسطینیوں کی تحریک انتفاضہ کے حوالے سے لاحق ہے۔ یہی وجہ ہے کہ طاقت کے ذریعے فلسطینیوں کی اس تحریک کو دبانے کی کوشش کررہا ہے۔
عزت الرشق کا کہنا تھا کہ اسرائیلی فوج کی جانب سے نہتے فلسطینیوں پر طاقت کا استعمال انہیں آزادی کے لیے جدو جہد سے باز نہیں رکھ سکتا اور نہ اس طرح کے اوچھے ہتھکنڈے کسی نئی تحریک انتفاضہ کی راہ روک سکتے ہیں۔ فلسطینی عوام اپنی سرزمین اور تمام مقدسات کی پنجہ یہود سے آزادی تک اپنی جدو جہد جاری رکھیں گے۔
خیال رہے کہ چند روز قبل بیت المقدس میں یہودی آباد کاروں نے ایک تیئس سالہ فلسطینی نوجوان عبدالرحمان الشلودی کو گولیاں مار کر شہید کردیا تھا۔ اس پر الزام عاید کیا گیا تھا کہ اس نے اپنی کار کی ٹکر سے دانستہ طور پر متعدد یہودی آباد کاروں کو ہلاک اور زخمی کیا ہے۔ اس اندھے قتل کے بعد بیت المقدس میں اسرائیل کے خلاف پرتشدد مظاہرے پھوٹ پڑے ہیں۔
بشکریہ:مرکزاطلاعات فلسطین