بیروت (فلسطین نیوز۔مرکز اطلاعات) اسلامی تحریک مزاحمت (حماس) کے اعلیٰ سطحی وفد نے گذشتہ روز لبنان میں متعین الجزائرکے سفیر سے ملاقات کی۔ ملاقات میں حماس رہنماؤں نے حال ہی میں ایک ہوائی جہاز کے حادثے میں ہونے والی اموات پر گہرے دکھ اور افسوس کا اظہار کیا۔
فلسطین نیوز کو موصول ہونے والی اطلاعات کے مطابق حماس کی قیادت نے لبنان میں متعین الجزائری سفیر احمد بوزیان سے فوجی طیارے کے حادثے اور اس کے نتیجے میں ہونے والی اموات پر گہرے دکھ اور افسوس کا اظہار کیا ہے۔حماس کے وفد میں لبنان میں حماس کے مندوب علی برکہ، جماعت کے سیاسی تعلقات کے انچارج زیاد حسن اور شعبہ اطلاعات ونشریات کے سربراہ عبدالمجید عوض شامل تھے۔
اس موقع پر علی برکہ نے الجزائری سفیر سے کہا کہ فلسطینی قوم اور حماس مشکل کی اس گھڑی میں الجزائری حکومت اور عوام کے ساتھ ہیں۔
انہوں نے طیارے کے حادثے میں فوت ہونے والے شہریوں کے لیے دعائے مغفرت، پسماندگان کے لیے صبر جمیل کی دعا کی۔
خیال رہے کہ گذشتہ ہفتے الجزائری وزارت دفاع کا ایک طیارہ گر کر تباہ ہو گیا تھا جس میں سوار 257 افراد لقمہ اجل بن گئے تھے۔