غزہ (فلسطین نیوز۔مرکز اطلاعات) فلسطین کی اسلامی مزاحمتی تحریک حماس کے فوجی بازو عزالدین قسام بریگیڈ نے کہا ہے کہ مزاحمتی تحریک کے ہتھیار حماس کی ریڈ لائن ہے۔
فلسطین نیوز کو موصول ہونے والی اطلاعات کے مطابق حماس کے فوجی بازوعزالدین قسام بریگیڈ نے اپنے بیا ن میں کہا ہے کہ تحریک حماس اپنے مقدس مشن اور اپنی طاقت کے زیرسایہ اپنے ہتھیاروں کی حفاظت کرے گی جو مسئلہ فلسطین، فلسطینی عوام اور ان کی عزت و شرف کے ضامن ہیں۔حماس کے فوجی بازو نے کہا کہ فلسطین، بیت المقدس اور مسجد الاقصی کے لئے کوششوں کو یکجا کرنا ہی فلسطین کی آزادی کا واحد طریقہ ہے۔ بیان میں کہا گیا ہے عزالدین قسام بریگیڈ استقامتی سرگرمیوں کو یکجا کرنے کے لئے اپنی کوشش جاری رکھے گا۔
حماس کے فوجی بازو کے بیان میں امریکا اسرائیل اور ان کے علاقائی پٹھوؤں کے ذریعے تل ابیب انتظامیہ کے ساتھ تعلقات کو معمول پرلانے کی تیزی کے ساتھ انجام دی جانے والی کوششوں کی مذمت کرتے ہوئے کہا گیا ہے کہ بیت المقدس کے بارے میں ٹرمپ کے اعلان کے بعد فلسطینی علاقوں میں صیہونی فوجیوں اورفلسطینی نوجوانوں کے درمیان جھڑپیں شدت اختیار کرگئی ہیں۔