بیت المقدس – (فلسطین نیوز۔مرکز اطلاعات) صہیونی فوج کے ایک سینیر عہدے دار کا کہنا ہے کہ غزہ کی سرحد کے ساتھ ایک زیر زمین دیوار تعمیر کی جارہی ہے۔اس کا مقصد اسرائیلی علاقے کی جانب آنے والی حماس کی سرنگوں کا راستہ روکنا ہے۔یہ دیوار آیندہ چند مہینوں میں مکمل ہوجائے گی۔
فلسطین نیوز کو موصول ہونے والی اطلاعات کے مطابق اسرائیلی فوج کی جنوب کمان سے تعلق رکھنے والے اس کمانڈر کا کہنا ہے کہ غزہ کی پٹی کے ساتھ قریباً ساٹھ کلومیٹر طویل یہ دیوار تعمیر کی جارہی ہے۔ یہ زمین کے اوپر اور زیر زمین گہرائی بنائی جارہی ہے۔اس عہدے دار نے اپنی شناخت ظاہر نہ کرنے کی شرط پر کہا ہے کہ اس دیوار کی تعمیر کا مقصد حماس کے زیر زمین نیٹ ورک کو موت کے کنویں میں تبدیل کرنا ہے۔
واضح رہے کہ 2014ء کی جنگ کے دوران حماس کے جنگجو متعدد مواقع پر اپنے زیر زمین سرنگوں کے نیٹ ورک کے ذریعے اسرائیلی علاقے تک پہنچنے میں کامیاب ہو گئے تھے۔اس جنگ کے دوران اسرائیلی فوج نے بتیس سرنگوں کو تباہ کردیا تھا۔اسرائیلی عہدے دار کا کہنا ہے کہ فوج اب اس خطرے سے نمٹنے کے لیے بھرپور اقدامات کر رہی ہے۔