خلیجی ریاست قطر کے امیر الشیخ تمیم بن حمد آل ثانی نے نیو یارک میں جنرل اسمبلی کے اجلاس سے خطاب کرتے ہوئے عالمی سلامتی کونسل پر زور دیا ہے کہ وہ مسئلہ فلسطین کے حل کے حوالے سے اپنی ذمہ داریاں پوری کرے۔ ان کا کہنا ہے کہ غزہ کی پٹی پر اسرائیلی فوج کا حملہ انسانیت کے خلاف جنگی جرائم میں سے ایک جرم ہے۔ عالمی برادری فلسطین میں اسرائیل کا ناجائز قبضہ ختم کرانے لیے موثر حکمت عملی وضع کرے۔
مرکز اطلاعات فلسطین کے مطابق جنرل اسمبلی کے اجلاس سے خطاب کرتے ہوئے امیر قطر کا کہنا تھا کہ دنیا میں استعماری طاقتوں کو لگام دی جا چکی۔ مشرق وسطیٰ میں اسرائیل واحد استعماری ملک ہے جس نے سرزمین فلسطین پر ناجائز قبضہ جما رکھا اور طاقت کے استعمال سے فلسطینی قوم کی نسل کشی کر رہا ہے۔
امیر قطر نے کہا کہ امن و سلامتی اس وقت تک نہیں آسکتی جب تک عالمی قوانین اور بین الاقوانی انسانی حقوق کا احترام نہ کیا جائے۔ غزہ کی پٹی پر اسرائیلی فوج کے وحشیانہ حملوں اور دو ہزار نہتے فلسطینیوں کی شہادت کے بعد عالمی برادری کی ذمہ داری ہے کہ وہ اسرائیل کو عالمی ادارے کی قراردادوں کا پابند بنائے۔ انہوں نے سلامتی کونسل سے مطالبہ کیا کہ وہ یو این چارٹر کے باب 7 کے تحت فلسطین سے اسرائیل کا قبضہ ختم کرانے کے لیے اقدامات کرے۔
بشکریہ:مرکزاطلاعات فلسطین