غزہ (فلسطین نیوز۔مرکز اطلاعات) فلسطین کے علاقے غزہ پٹی میں جمعرات کی شام ایک خاندانی جھگڑے اور اس دوران ایک گھر میں موجود گیس سیلنڈر کے دھماکے کے نتیجے میں کم سے کم 8 افراد جاں بحق اور 20 زخمی ہوگئے۔
فلسطین نیوز کو موصول ہونے والی اطلاعات کے مطابق وزارت صحت کے مطابق یہ واقعہ جمعرات کو مقامی وقت کے مطابق عصر کے بعد جنوبی غزہ میں الصبرہ کے مقام پر پیش آیا۔پولیس کا کہنا ہے کہ الصبرہ کالونی میں پہلے ایک گھر میں جھگڑا ہوا جس کے بعد بوسیدہ گھر میں گیس سیلنڈر زور دار دھماکے سے پھٹ گیا۔
دھماکے سے مکان کا ایک حصہ زمین بوس ہوگیا جس کے نتیجے میں آٹھ افراد جاں بحق اور بیس زخمی ہوگئے۔
پولیس نے واقعے کی تحقیقات شروع کردی ہیں۔ اطلاعات کے مطابق زمین بوس ہونے والے مکان کے ملبے تلے اب بھی افراد کی موجودگی کا امکان ہے۔ ریسکیو ٹیمیں ملبہ ہٹانے کا کام رات بھر سے جاری رکھے ہوئے ہیں۔
محکمہ صحت کے مطابق اسپتال لائے گئے زخمیوں میں سے بعض کی حالت تشویشناک ہے۔ غزہ جو پہلے ہی صحت کے سنگین بحران سے دوچار ہے میں علاج کہ سہولت نہ ملنے کے باعث ہلاکتوں میں اضافے کا اندیشہ ہےْ۔