اسرائیلی فوج کی طرف سے غزہ کے جنوبی علاقے رفح پر کی جانے والی شیلنگ کے نتیجے میں جمعہ کے روز شہید ہونے والوں کی تعداد 70 سے تجاوز کر چُکی ہے۔
فلسطین کی وزارت صحت کے ڈائریکٹر مدحت عباس نے بتایا کہ اسرائیل کی طرف سے کی جانے والی بمباری کے نتیجے میں 70 سے زائد افراد شہید ہو چُکے ہیں جبکہ 300 افراد زخمی ہوئے ہیں۔
غزہ حکام کے مطابق آٹھ جون سے اس فلسطینی علاقے میں شروع ہونے والے اسرائیلی حملوں کے نتیجے میں اب تک 1509 فلسطینی شہید ہو چکے ہیں جبکہ سات ہزار سے زائد زخمی ہیں۔ غزہ میں شہید اور زخمی ہونے والوں میں سے بڑی تعداد خواتین اور بچوں کی ہے۔
دوسری طرف اسرائیلی فوجی ہلاکتوں کی تعداد 114 تک پہنچ گئی ہے جبکہ 400 سے زائد زخمی ہیں۔
یاد رہے کہ اسرائیل کی تمام تر فوجی ہلاکتیں 17 جولائی سے غزہ میں شروع کیے جانے والے زمینی آپریشن کے بعد سے اب تک ہوئی ہیں۔ غزہ کے علاقے سے داغے جانے والے راکٹوں کی زد میں آ کر تین اسرائیلی شہری بھی ہلاک ہوئے۔
بشکریہ:مرکزاطلاعات فلسطین