فلسطینی شہر غزہ کی پٹی میں معذور افراد کی کفالت میں سرگرم ایک مقامی ادارے کے مرکز پر اسرائیلی فوج کے فضائی حملے میں 3 معذور بچیوں سمیت کم سے کم 6 شہری شہید اور ایک درجن کے قریب زخمی ہو گئے ہیں۔ بمباری سے فلاحی ادارے کی عمارت ملبے کا ڈھیر بن گئی۔
مرکز اطلاعات فلسطین کے مطابق غزہ میں ایک فیلڈ آبزرویٹر نے میڈیا کو بتایا کہ صہیونی فوج نے ہفتے کو علی الصباح بیت لاھیا کے مقام پر”مبرۃ فلسطین فاؤنڈیشن” کے مرکز پر میزائل حملہ کیا جس کے نتیجے میں 3 معذور بچیاں اور 3 دیگر افراد شہید ہو گئے جبکہ بمباری میں ادارے کی نگراں خاتون بھی شدید زخمی ہیں۔عینی شاہدین کے مطابق اسرائیلی فوج کی جانب سے غزہ کی پٹی میں مساجد اور فلاحی اداروں کے مراکز پر وحشیانہ حملے جاری ہیں۔ رات گئے اسرائیلی فوج نے کئی مساجد اور فلاحی اداروں کے دفاتر کو میزائل حملوں کا نشانہ بنایا جس کے نتیجے میں متعدد افراد زخمی ہو گئے۔
ادھر خان یونس میں اسرائیلی فوج کی بمباری میں اسلامی تحریک مزاحمت "حماس” کے مرکزی رہ نما ’’یحییٰ السنوار‘‘ کا مکان مکمل طور پر زمین بوس ہو گیا تاہم گھر پر نہ ہونے کے باعث کسی قسم کا جانی نقصان نہیں ہوا ہے۔