مرکزاطلاعات فلسطین کے مطابق غزہ کی ناکہ بندی توڑنے میں سرگرم امدادی ادارے "انسداد محاصرہ برائے غزہ” کے رکن انور الغربی نے ایتھن میں امدادی جہازوں کی غزہ کی جانب روانگی سے قبل میڈیا سے بات کرتے ہوئے کہا کہ اسرائیل کی طرف سے امدادی قافلے”فریڈم فلوٹیلا 3 ” پرحملوں کی دھمکیاں دی گئی ہیں۔ ہم ان دھمکیوں کو انسانی حقوق کے اداروں اور امدادی کارکنوں کے خلاف کھلی ننگی جارحیت کا اعلان سمجھتے ہیں۔
الغربی کا کہنا تھا کہ اسرائیلی ریاست کی گیڈر بھبکیوں سے امدادی اداروں کو محصورین غزہ کی امداد سے نہیں روکا جاسکتا۔ اسرائیل کچھ بھی کرلے ہم امدادی جہاز غزہ لے جانے کی آخری کوشش کریں گے۔
ایک سوال کے جواب میں امدادی ادارے کے کارکن کا کہنا تھا کہ غزہ کی پٹی کے محصورین کی مدد کرنا ہمارا آئینی اور قانونی حق ہے اور اس مقصد کے لیے ہمیں امدادی قافلے بھیجنے کی مکمل آزادی حاصل ہے تاہم دوسری جانب صہیونی ریاست کی جانب سے امدادی قافلوں پرحملوں کا امکان موجود ہے کیونکہ صہیونی فوج کی جانب سے فریڈم فلوٹیلا تین کے جہازوں کو کھلے سمندر میں نشانہ بنانے کی دھمکیاں دی جا رہی ہیں۔
خیال رہے کہ غزہ کی پٹی کا محاصرہ توڑںے کے لیے امدادی جہازوں کا قافلہ فریڈم فلوٹیلا 3 ایتھن سے غزہ کی جانب روانہ ہوچکا ہے۔ امدادی قافلے میں تیونس کے سابق صدر ڈاکٹر منصف المرزوقی سمیت سیکڑوں اہم عالمی شخصیات شامل ہیں۔
بشکریہ:مرکزاطلاعات فلسطین