مرکزاطلاعات فلسطین کے مطابق غزہ کی ناکہ بندی توڑنے کے لیے سرگرم بین الاقوامی کمیٹی کے کوآرڈینیٹر اور رابطہ کار زاھر بیراوی نے بتایا کہ فریڈم فلوٹیلا 3 کے لیے انسانی حقوق کی عالمی تنظیموں کا ایک اہم اجلاس 16 اور 17 مئی کو یونان میں ہوگا جس میں کئی اہم بین الاقوامی شخصیات بھی شرکت کریں گی۔ اجلاس میں فریڈم فلوٹیلا 3 کی روانگی کے حوالے سے تیاریوں کا جائزہ لیا جائے گا۔
انہوں نے بتایا کہ اس اجلاس میں فریڈم فلوٹیلا کی روانگی کی تاریخ کا اعلان کیاجائے گا اور یہ بھی طے کیا جائے گا کہ آیا عالمی امدادی جہاز کہاں جمع ہوں گے اور کہاں سے ان کی روانگی ہوگی۔
زاھر بیراوی کا کہنا تھا کہ اس سے قبل جب بھی غزہ کی پٹی کی ناکہ بندی توڑنے کی کوشش کی گئی تو صہیونی حکومت کی جانب سے اس میں رکاوٹیں کھڑی کی گئیں لیکن اب کی بارہ وہ ایسا نہیں ہونے دیں گے۔ انہوں نے عالمی برادری سے مطالبہ کیاہے کہ وہ اسرائیل پر دبائو ڈالے تاکہ امدادی جہازوں کو غزہ پہنچنے میں کسی قسم کی رکاوٹ نہ ڈالی جائے۔
ایک سوال کےجواب میں البیراوی کا کہنا تھا کہ غزہ کی پٹی کے لیے تین بڑے بحری جہاز امدادی سامان لے جانے کی تیاری کررہے ہیں۔ ان جہازوں کے ہمراہ کئی اہم عالمی سیاسی شخصیات بھی شرکت کریں گی۔ ان میں سابق تیونسی صدر ڈاکٹر منصف المرزوقی بھی شامل ہیں۔
یاد رہے کہ سنہ 2010 ء میں پہلا فریڈم فلوٹیلا غزہ کی پٹی کی جانب روانہ ہوا تھا۔ قابض صہیونی فوجیوں نے جارحیت کا مظاہرہ کرتےہوئے عالمی امدادی جہازوں کو کھلے سمندر میں حملے کا نشانہ بنا کر ان میں سوار ترکی کے نو امدادی کارکنوں کو شہید اور پچاس کو زخمی کردیا تھا۔ صہیونی فوج نے تمام امدادی سامان لوٹ لیا تھا اور قافلے میں شامل چھ سو سے زاید امدادی کارکنوں کو یرغمال بنالیا گیا تھا۔
بشکریہ:مرکزاطلاعات فلسطین