مرکزاطلاعات فلسطین کے مطابق غزہ کی پٹی میں یتیم اور بیوہ خواتین کی بہبودکے لیے قائم کمیٹی کے ترجمان نے بتایا کہ فلسطینی بنک کی غزہ کی تمام برانچوں نے یتیموں اور بیوہ خواتین سمیت سیکڑوں غریب شہریوں کے بنک اکائونٹس بند کردیے ہیں اور ان اکائونٹس کے ذریعے انہیں ملنے والا وظیفہ بھی بند ہوگیا ہے۔
فلسطینی بنک کی جانب سے غریب اور ضرورت مند شہریوں کے بنک اکائونٹس بند کیے جانے کےخلاف غزہ کی پٹی میں بنک کے مرکزی دفتر کے باہراحتجاجی مظاہرہ بھی کیا گیا جس میں سیکڑوں بچوں، خواتین اور دیگر شہریوں نے شرکت کی۔
ترجمان کا کہنا تھا کہ غزہ کی پٹی میں سیکڑوں یتیم بچوں اور بیوہ خواتین سمیت کئی غریب گھرانوں کو مختلف فلاحی اداروں کی جانب سے ماہانہ بنیادوں پر وظائف جاری کیے جاتے ہیں۔ ان کے بنک اکائونٹس بند ہونے سے انہیں ملنے والی امداد بھی رک گئی ہے۔
خیال رہے کہ غزہ کی پٹی میں یتیم بچوں کو ماہانہ 50 ڈالر وظیفہ دیاجاتا ہے جو آج تک فلسطینی بنک ہی کے ذریعے انہیں ملتا رہا ہے لیکن بنک میں ان کے کھاتے بند ہونے کے بعد ان کے وظائف بھی بند ہوگئے ہیں۔
بشکریہ:مرکزاطلاعات فلسطین