اسرائیلی چیف آف جنرل سٹاف بینی گانٹس کا کہنا ہے کہ غزہ پر جلد یا بدیر ایک بڑی فوجی کارروائی سے فرار ممکن نہیں۔ صہیونی آرمی چیف نےاسرائیلی فوج کی ویب سائٹ پر جاری اپنے بیان میں کہا ہے کہ اسرائیل آئندہ غزہ کی پٹی پر حملے کے لیے پوری طور پر تیار ہے۔
ان کا کہنا تھا کہ اس مرتبہ غزہ پر مسلط کی گئی جنگ تین سال قبل کے حملے سے مختلف ہو گی۔
اسرائیلی عسکری ادارے کی رپورٹ کے مطابق اسرائیلی انفنٹری مسلسل اپنی استعداد میں اضافہ کر رہی ہے بالخصوص گزشتہ لبنان اور غزہ کی جنگوں سےحاصل ہونے والے سبق کے بعد رات کے اوقات میں قتل و غارت گری کرنے کی صلاحیت میں اضافہ کیا جا رہا ہے۔
اسرائیلی فوج کے مطابق اہلکاروں کی کارروائی کرنے اور کسی بھی حملے کی صورت میں فوری ردعمل کا اظہار کرنے کی صلاحیتوں کو بڑھا دیا گیا ہے۔ اس ضمن میں گزشتہ سال ایک نئی سنائپر گن بنائی گئی ہے جو ٹارگٹ کا درست نشانہ لگانےکی زیادہ صلاحیت رکھتی ہے۔
رپورٹ میں بتایا گیا کہ اسرائیل گزشتہ کسی بھی دور کے مقابلے میں اس وقت ہدف کو درست نشانہ بنانے والے راکٹ رکھتا ہے۔ اسی طریقے سے کسی بھی حملے کی صورت میں انتہائی تیزی سے جوابی کارروائی کرنے کی صلاحیت بھی پہلے کےمقابلے میں بڑھ چکی ہے۔
اسرائیلی فوج آئندہ جنگ میں دروازے توڑنے اور عمارتوں میں گھسنے کے لیے دھماکہ خیز مواد پر زیادہ انحصار کرے گا۔