مرکز اطلاعات فلسطین کے مطابق غزہ کی پٹی میں احتجاجی مظاہروں کی کال اسلامی جہاد کی جانب سے دی گئی ہے تاہم کئی دوسری تنظیموں نے بھی اس کال کی حمایت کی ہے۔
اسلامی جہاد کے مرکزی رہ نما محمد الحرازین نے غزہ کی پٹی میں ایک نیوز کانفرنس سے خطاب کرتے ہوئے کہا کہ شمالی غزہ ک سے جنوبی غزہ تک شاہراہ صلاح الدین پرایک طویل ریلی کا اہتمام کیا گیا ہے جس میں غزہ کی پٹی میں اسرائیلی بمباری سے تباہ ہونے والے مکانات کے مکینوں سمیت شہریوں کی بڑی تعداد شرکت کرے گی۔
انہوں نے فلسطینی عوام سے اپیل کی کہ وہ تعمیرنو کا عمل فوری شروع کرنے اور اسرائیل کی مسلط کردہ معاشی پابندیوں کے خلاف صدائے احتجاج بلند کرنے کے لیے زیادہ سے زیادہ تعداد میں احتجاجی مظاہروں اور مارچ میں شرکت کریں۔
ادھر غزہ کے مختلف اضلاع میں آج اتوار کو قومی دن کی تقریبات منعقد کی جا رہی ہے۔ اس موقع پر بھی فلسطین کی نمائندہ سیاسی اور مذہبی جماعتوں کی جانب سے شہر پر مسلط محاصرے کے خاتمے اور تعمیراتی سرگرمیاں جلد از جلد شروع کرنے کا مطالبہ کیا جائے گا۔
خیال رہے کہ رواں سال اسرائیل نے جولائی اور اگست کے دوران غزہ کی پٹی پر وحشیانہ بمباری کرکے لاکھوں مکانات تباہ کردیے تھے۔ اقوام متحدہ کے اعدادو شمار کے مطابق کم سے کم ایک لاکھ مکانات بری طرح متاثر ہوئے ہیں۔ جس کے نتیجے میں چھ لاکھ فلسطینی بے گھرہوئے۔ عالمی برادری کی جانب سے امداد کے وعدوں کے باوجود تعمیر نو کی سرگرمیاں شروع نہیں کی جاسکی ہیں اور نہ ہی اسرائیلی محاصرے کو توڑا گیا ہے۔
بشکریہ:مرکزاطلاعات فلسطین