غزہ (فلسطین نیوز۔مرکز اطلاعات) فلسطین کے علاقے غزہ میں آج جمعہ 20 جولائی کو صیہونی ریاست کے غاصبانہ تسلط اور حق واپسی سلب کیے جانے کے خلاف وسیع پیمانے پر مظاہروں کا اعلان کیا گیا ہے۔
فلسطین نیوز کو موصول ہونے والی اطلاعات کے مطابق غزہ کی مشرقی سرحد پر مظاہروں کے لیے تمام مقامی تنظیمیں متحرک ہیں اور مشرقی سرحد پر آج جمعہ کو بڑی تعداد میں فلسطینیوں کو جمع کیا جا رہا ہے۔حق واپسی سپریم کمیٹی کی طرف سے جاری کردہ ایک بیان میں کہا گیا ہے کہ 30 مارچ 2018ء کو شروع ہونے والے مظاہروں کو آگے بڑھاتے ہوئے آج جمعہ کو غزہ کی پوری مشرقی سرحد پر جگہ جگہ مظاہرے اورریلیاں منعقد کی جائیں گی۔
آج کے احتجاجی مظاہروں کے لیے ’جمعہ تحریک حق واپسی کے خلاف صیہونی سازش آگے نہیں بڑھانے دی جائے گی‘ عنوان منتخب کیا گیا ہے۔ اس کا مقصد مظاہروں کے لیے صیہونی ریاست سے سلب کردہ حق واپسی لینے کا مطالبہ کرنا اور دنیا کو اس دیرینہ فلسطینی حق کی طرف متوجہ کرنا ہے۔
خیال رہے کہ 30 مارچ 2018ء کو فلسطین میں یوم الارض کے عنوان سے ہونے والے مظاہروں نے ایک تحریک کی شکل اختیارکرلی ہے۔ اسرائیلی فوج طاقت کے ذریعے فلسطینی ریلیوں کو کچلنے کی کوشش کرتی ہے مگر اس کے باوجود فلسطینی شہری تحریک جاری رکھنے کے لیے پرعزم ہیں۔
اسرائیلی فوج تیس مارچ کے بعد اب تک ڈیڑھ سو فلسطینی مظاہرین کو شہید اور سولہ ہزار سے زائد کو زخمی کرچکی ہے۔