غزہ (فلسطین نیوز۔مرکز اطلاعات) فلسطینی وزارت صحت کے مطابق غزہ کی پٹی میں گذشتہ جمعہ کو مشرقی سرحد پر احتجاجی مظاہروں کی کوریج کرتے ہوئے اسرائیلی فوج کی فائرنگ سے زخمی فلسطینی صحافی دم توڑ گیا۔
فلسطین نیوز کو موصول ہونے والی اطلاعات کے مطابق صحافی احمدابو حسین گذششتہ جمعہ کو اس وقت زخمی ہوگیا تھا جب وہ دوسرے صحافیوں کے ساتھ واپسی مظاہروں کی کوریج کررہا تھا۔زخمی ہونے کے بعد اسے غزہ میں فلسطین میڈیکل کمپلیکس میں منتقل کیا گیا۔ وہاں سے اسے اندرون فلسطین کے تل ھاشومیر اسپتال لے جایا گیا۔ تاہم اس کی حالت مسلسل تشویشناک رہی اور کل بدھ کو زخموں کی تاب نہ لاتے ہوئے دم توڑ گیا۔
خیال رہے کہ ابو حسین دوسری صحافی ہیں جنہوں نے مشرقی غزہ میں فلسطینیوں کی حق واپسی ریلیوں کے دوران کوریج کرتے ہوئے اپنی جانوں کا نذرانہ پیش کیا ہے۔ اس سے قبل صحافی اور فوٹو گرافر یاسر مرتجیٰ بھی انہی ریلیوں کی کوریج کرتے ہوئے جام شہادت نوش کرچکے ہیں۔