اسرائیلی فوج نے فلسطین کے علاقے غزہ کی پٹی پر سوموار کو علی الصباح جنگی طیاروں سے نچلی پروازوں کے ساتھ ساتھ فرضی بمباری کی جس کے نتیجے میں شہریوں میں خوف و ہراس کی فضاء پائی جا رہی ہے۔
عینی شاہدین نے مرکزاطلاعات فلسطین کو بتایا کہ اسرائیل کے ’’ایف 16 ‘‘ جنگی طیاروں کے ذریعے غزہ کی فضاء میں فرضی بمباری کی گئی۔ نچلی پروازوں اور فرضی بمباری کے دوران شہری گھروں میں محصور ہوکر رہ گئے۔
عینی شاہدین نے بتایا کہ صہیونی فوج کے جنگی طیاروں کے ذریعے فرضی بمباری میں زور دارآواز پیدا کرنےوالے بم برسائے گئے جس کے نتیجے میں شہری سخت خوف کا شکار ہوئے۔
خیال رہے کہ پچھلے سال جولائی اور اگست کے دوران اسرائیلی فوج نے غزہ کی پٹی پروحشیانہ بمباری کرکے 2311 فلسطینیوں کو شہید اور ہزاروں کو زخمی کردیا تھا۔ اس کے بعد فلسطینی مزاحمتی تنظیموں اور اسرائیل کے درمیان عارضی جنگ بندی معاہدہ بھی طے پا چکا ہے مگر اس کے باوجود صہیونی فوج آئے روز فرضی حملے کرتی اور شہریوں کو خوف زدہ کرتی رہتی ہے۔
بشکریہ:مرکزاطلاعات فلسطین