غزہ ( فلسطین نیوز۔مرکز اطلاعات) فلسطین کے علاقے غزہ کی سرحد پر مشتعل فلسطینی شہریوں نے اسرائیلی فوج کی متعدد گاڑیوں کو آگ لگا دی جس کے نتیجے میں گاڑیاں جل کر راکھ ہوگئیں۔ سوشل میڈیا پر سرحد پر گاڑیوں کو لگائی گئی آگ کی تصاویر اور فوٹیج بھی نشر کی گئی ہیں۔
فلسطین نیوز کو موصول ہونے والی اطلاعات کے مطابق قطر سے عربی میں نشریات پیش کرنے والے ’الجزیرہ‘ ٹی وی کی رپورٹ غزہ کی سرحد پراسرائیلی فوجی گاڑیوں کو آگ لگے دکھایا گیا ہے۔رپورٹ کے مطابق غزہ کی پٹی میں فلسطینی نوجوان سرحدی باڑ عبور کرکے اسرائیلی فوجی کیمپ کے قریب پہنچ گئے جہاں کھڑی فوجی گاڑیوں کو آگ لگا دی۔
اسرائیلی فوج کے ترجمان کا ایک بیان بھی سامنے آیا ہے جس میں اس کا کہنا ہے کہ مشرقی غزہ کی سرحدی باڑعبور کرکے دو فلسطینی نوجوان ممنوعہ علاقے میں داخل ہونے اور فوجی گاڑیوں کو آگ لگانے میں کامیاب ہوگئے تھے۔
ترجمان نے بتایا کہ دونوں فلسطینی نوجوان کارنی گذرگاہ کے قریب سے دیوار فاصل کو سوراخ کرکے اندر داخل ہوئے اور وہاں پر کھڑی گاڑیوں کو آگ لگا دی۔ فلسطینی شہری اسرائیلی فوجی گاڑیوں کو آگ لگانے کے بعد بہ حفاظت واپس آگئے۔