رپورٹ کے مطابق صہیونی ملٹری انٹیلی جنس کے چیئرمین ہرزی ھلیوی نے اپنے ایک بیان میں کہا کہ غزہ کی پٹی کی ابتر معاشی صورت حال اسرائیل کے لیے بھی خطرہ ہے کہ معاشی بحران غزہ میں آتش فشاں بن پر پھٹ سکتا ہے۔
اسرائیلی کنیسٹ کی خارجہ و سیکیورٹی کمیٹی کے اجلاس سے خطاب میں جنرل ھلیوی نے کہا کہ فلسطینی تنظیم اسلامی تحریک مزاحمت ’’حماس‘‘ جنگ نہیں چاہتی۔ غزہ کی پٹی میں معاشی سہولیات وہاں کی آبادی کو اپنی مشکلات کم کرنے میں معاون ثابت ہوسکتی ہیں۔
ملٹری انٹیلی جنس کے چیف نے خبردار کیا کہ اگر غزہ کی پٹی پرعائد اقتصادی پابندیاں بدستور قائم رہیں تو غزہ اسرائیل کے سامنے آتش فشاں بن کرپھٹ سکتا ہے جس کے نتیجے میں صہیونی ریاست کو بدترین مشکلات کا سامنا کرنا پڑ سکتا ہے۔
رپورٹ کے مطابق جنرل ھلیوی نے اقوام متحدہ کی غزہ کی پٹی کے حوالے سے جاری کردہ ایک رپورٹ کا بھی حوالہ دیا جس میں خبردار کیا گیاہے کہ غزہ کی پٹی کہ ناکہ بندی وہاں کے عوام میں غم وغصے میں اضافے کا موجب بن سکتی ہے۔ رپورٹ میں کہا گیا ہے کہ گذشتہ چار برسوں کے دوران غزہ کا علاقہ ناقابل رہائش ہوچکا ہے کیونکہ وہاں بنیادی انسانی ضروریات کا شدید فقدان ہے۔
خیال رہے کہ اسرائیل نے سنہ 2006 ء میں فلسطین میں پارلیمانی انتخابات میں حماس کی شاندار کامیابی کے رد عمل میں غزہ کی پٹی پر اقتصادی پابندیاں عائد کردی تھیں۔ آج ان پابندیوں کو دسواں سال ہے اور علاقے میں بنیادی ضرورت کی اشیاءکا شدید فقدان ہے۔