غزہ – (فلسطین نیوز۔مرکز اطلاعات) مشرق وسطیٰ کے لیے قائم کردہ عالمی امن گروپ کے رابطہ کار نیکولائے ملادینوف نے سفارت کاروں کے ایک وفد کے ہمراہ فلسطین کے علاقے غزہ کی پٹی کا دورہ کیا۔
فلسطین نیوز کو موصول ہونے والی اطلاعات کے مطابق فلسطینی سیکیورٹی ذرائع نے بتایا کہ عالمی امن مندون اور سفارت کاروں کا وفد غرب اردن اور غزہ کے درمیان ’ایریز‘ گذرگاہ سے غزہ داخل ہوا۔ وفد میں نیکولائے ملادینوف سمیت چھ دیگر سفارتی اہلکار شامل تھے۔مشرق وسطیٰ میں قیام امن کے لیے قائم امریکا، یورپی یونین، اقوام متحدہ اور روس پر مشتمل گروپ کے ایلچی نے غزہ کی پٹی میں اقوام متحدہ کے دفتر کا دورہ کیا۔ انہوں نے غزہ میں فلسطینی حکومتی عہدیداروں سے بھی ملاقات کی۔
غزہ کی پٹی میں امن وامان کی صورت حال کا جائزہ لینے کے بعد گروپ چار کے مندوب واپس غرب اردن روانہ ہوگئے۔