غزہ – (فلسطین نیوز۔مرکز اطلاعات) فلسطین کے علاقے غزہ کی پٹی سے تعلق رکھنے والی ایک معلمہ کو سنہ 2017ء میں اساتذہ کے عالمی مقابلے کے لیے منتخب کیا گیا ہے۔
فلسطین نیوز کو موصول ہونے والی اطلاعات کے مطابق غزہ کے علاقے رفح کی رہائشی مونا عوض اللہ نے ایک بیان میں بتایا ہے کہ اسے فلسطین کی بہترین استانی کی حیثیت سے عالمی مقابلہ برائے سنہ 2017ء کے لیے منتخب کیا گیا ہے۔ مقابلے کے پہلے مرحلے میں اس نے تیسری پوزیشن حاصل کی ہے۔ایک سوال کے جواب میں فلسطینی معلمہ کا کہنا تھا کہ وہ چناؤ کے پہلے مرحلے میں تیسرے نمبر پر آئی ہیں جس کے بعد اگلے مراحل میں داخلہ آسان ہوگیا ہے۔ تاہم اس کا کہنا تھا کہ پہلے سال اس کا انتخاب آن لائن ایک مقابلے کے دوران ہوا تھا۔
انہوں نے بتایا کہ کل 3 ہزار امیدواروں میں سے پہلے مرحلے میں 50 خواتین اساتذہ کا انتخاب عمل میں لایا جائے گا۔ پہلے مرحلے میں کامیاب ہونے والی امیدواریں دوسرے مرحلے میں شامل ہوں گی جب کہ تیسرے اور آخری مرحلے میں تین خواتین کے درمیان مقابلہ ہو گا۔
مونا عوض اللہ کے اساتذہ کے عالمی مقابلے میں شمولیت پر سماجی حلقوں کی طرف سے غیرمعمولی تحسین کی گئی ہے۔ سوشل میڈیا پر عوض اللہ کی حمایت میں مہم جاری ہے اور شہری فلسطینی استانی کو سنہ 2017ء کی بہترین معلمہ قرار دینے کا مطالبہ کر رہے ہیں۔