حماس کے ملازمین، تنخواہوں کے معاملے کے حل کی مصری پیشکش

غزہ – (فلسطین نیوز۔مرکز اطلاعات) فلسطینی جماعتوں اسلامی تحریک مزاحمت ’حماس‘ اور فتح کے درمیان مصالحتی معاہدے پر عمل درآمد میں رکاوٹوں کے بعد مصر نے دونوں جماعتوں میں پائے جانے والے دیرینہ تنازعات کے حل میں مدد کی پیش کش کی ہے۔

فلسطین نیوز کو موصول ہونے والی اطلاعات کے مطابق مصر نے حماس اور فتح کے قاہرہ میں اجلاس کے دوران حماس کے دور میں بھرتی ہونے والے ملازمین اور ان کی تنخواہوں کی ادائیگی کے معاملے پر نظر رکھنے کے لیے مشترکہ کمیٹی تشکیل دینے پر زور دیا ہے اور ساتھ ہی کہا ہے کہ قاہرہ دونوں جماعتوں میں پائے جانے والے اختلافات کو دور کرنے کے لیے ہرممکن تعاون کے لیے تیار ہے۔

مصر کی طرف سے یہ تجویز ایک ایسے وقت میں پیش کی گئی ہے جب حماس اور فتح کے درمیان حالیہ ایام میں مصالحتی کوششوں کو ناکام بنانے کے الزامات کے تبادلے کے ساتھ معاہدے پرعمل درآمد کی خبریں آ رہی ہیں۔ فلسطینی اتھارٹی نے حماس کے دور میں بھرتی ہونے والے ملازمین کو فلسطینی اتھارٹی کے دفاتر میں داخل ہونے سے روک دیا تھا۔

تحریک فتح کی طرف سے غزہ کی پٹی میں حماس کے ملازمین کو اہم عہدوں پر برقرار رکھنے کے مطالبے کو مسترد کئے جانے اور حماس کے ملازمین کی تعداد نصف کرنے کے معاملے پر دونوں جماعتوں میں سخت تناؤ پایا جا رہا ہے۔

تحریک حماس کی طرف سے فلسطینی حکومت پر قومی مصالحت کو سبوتاژ کرنے کا الزام عائد کیا ہے اور کہا ہے کہ دو ماہ گذرنے کے باوجود حکومت نے غزہ کی پٹی میں فلسطینی شہریوں پر عائد کردہ پابندیاں اٹھانے کے لیے کوئی اقدامات نہیں کیے۔

حماس کی طرف سے فلسطینی حکومت کے سربراہ رامی الحمد اللہ کو سخت الفاظ میں تنقید کا نشانہ بنایا اور کہا ہے کہ حکومت غزہ کے عوام کے مسائل حل کرے اور غزہ پر عائد کردہ پابندیاں اٹھائے ورنہ گھر جائے۔