غزہ (فلسطین نیوز۔مرکز اطلاعات) اقوام متحدہ کے مندوب برائے انسانی امور نے کہا ہے کہ غزہ کی پٹی میں پناہ گزینوں کی زندگی بچانے کے لیے 20 لاکھ ڈالر کی رقم صرف کرنے کا فیصلہ کیا گیا ہے۔
فلسطین نیوز کو موصول ہونے والی اطلاعات کے مطابق ’یواین‘ مندوب جیمی میک گولڈریک نے ایک پریس بیان میں کہا کہ غزہ کی پٹی میں ہنگامی بنیادوں پر ایندھن کی فراہمی کو یقینی بنانے کی کوشش کی جا رہی ہے۔ ان کا کہنا تھا کہ غزہ کی پٹی میں 250 اہم منصوبوں جن میں بجلی، گیس، صحت، تعلیم، پانی، سیورج اور دیگر منصوبوں کے لیے 20 لاکھ ڈالر کی رقم مختص کی گئی ہے۔اقوام متحدہ کے عہدیدار کا کہنا تھا کہ غزہ کی پٹی میں بجلی کا بدترین بحران جاری ہے۔ ایک ماہ کے لیے غزہ کےعوام کو 9 لاکھ 50 ہزار لٹر ایندھن فراہم کیا جائے گا۔
ماک گریک کا کہنا تھا کہ غزہ کی پٹی میں ہنگامی بنیادوں پر فوری امداد کی ضرورت ہے۔ انہوں نے امداد دینے والے ملکوں پر زور دیا کہ وہ غزہ کی پٹی میں فلسطینی شہریوں بالخصوص پناہ گزینوں کے حوالے سے اپنی ذمہ داریاں پوری کریں۔