غزہ – (مرکزاطلاعات فلسطین فاؤنڈیشن) غزہ پٹی میں وزارتِ صحت نے اعلان کیا ہے کہ گیارہ اکتوبر سنہ 2025ء کو جنگ بندی کا معاہدہ نافذ العمل ہونے کے بعد سے اب تک شہداء کی مجموعی تعداد بڑھ کر 1254 ہو چکی ہے، جبکہ زخمیوں کی تعداد اکتالیس سو اکیس ہے، اس کے علاوہ اسرائیلی خلاف ورزیوں کے تسلسل کے دوران آٹھ سو چار لاشیں بھی نکالی گئی ہیں۔
وزارت نے بدھ کے روز جاری کردہ اپنی یومیہ شماریاتی رپورٹ میں بتایا کہ پٹی کے ہسپتالوں نے پچھلے چوبیس گھنٹوں کے دوران چار شہداء کے جسدِ خاکی وصول کیے، جن میں دو ایسے شہداء شامل ہیں جو اپنے زخموں کی تاب نہ لاتے ہوئے شہید ہوئے، اور دو ایسے شہداء ہیں جن کی لاشیں نکالی گئیں، اس کے علاوہ ایک زخمی بھی لایا گیا۔
وزارت نے اس بات کی تاکید کی کہ بہت سے متاثرین ہنوز ملبے کے نیچے اور سڑکوں پر موجود ہیں، ایسے وقت میں جب میدانی حالات کی وجہ سے ایمبولینس اور شہری دفاع کا عملہ ان تک پہنچنے سے قاصر ہے۔
انہوں نے واضح کیا کہ وزارت کی طرف سے جاری کردہ تازہ ترین سرکاری اعداد و شمار کے مطابق سات اکتوبر سنہ 2023ء سے غزہ پٹی پر قابض اسرائیل کی جارحیت کی مجموعی تعداد بڑھ کر تہتر ہزار تین اکیاسی شہداء اور ایک لاکھ چوہتر ہزار دو سو اکیس زخمیوں تک پہنچ گئی ہے۔
قابض اسرائیل کی فورسز غزہ پٹی میں انسانی اور امدادی سامان اور طبی ضروریات کے داخلے میں رکاوٹیں کھڑی کرنے اور جاری محاصرے کے ساتھ ساتھ جنگ بندی کے معاہدے کی خلاف ورزیاں مسلسل جاری رکھے ہوئے ہیں، اور انسانی حالات کے مزید ابتر ہونے کے انتباہات بھی سامنے آ رہے ہیں۔
