مزاحمتی سرگرمیوں میں تیزی، اپریل کے دوران 222 کارروائیاں ریکارڈ

مقبوضہ مغربی کنارہ – (روزنامہ قدس ـ آنلائن خبر رساں ادارہ)قابض اسرائیل اور یہودی آباد کاروں کے بڑھتے ہوئے مظالم اور سفاکیت کے جواب میں گذشتہ ماہ اپریل کے دوران فلسطینی نوجوانوں نے مغربی کنارے اور مقبوضہ بیت المقدس میں 222 معیاری اور عوامی مزاحمتی کارروائیاں انجام دیں۔

مرکز اطلاعات فلسطین معطی نے ایک پریس ریلیز میں بتایا ہے کہ ان مزاحمتی کارروائیوں کے نتیجے میں مختلف مقامات پر پانچ قابض اسرائیلی زخمی ہوئے۔

رپورٹ میں واضح کیا گیا ہے کہ ان کارروائیوں میں دو اہم اور معیاری کارروائیاں بھی شامل ہیں، جن میں سے ایک رام اللہ کے مشرق میں واقع قصبے سلواد سے تعلق رکھنے والے شہید عبدالحلیم حماد کی چاقو سے کی گئی کارروائی ہے، جس کے نتیجے میں دو قابض اسرائیلی فوجی زخمی ہوئے تھے۔

اسی تناظر میں عوامی مزاحمت کے مختلف طریقے بھی جاری رہے، جہاں 220 عوامی کارروائیاں دستاویزی شکل میں ریکارڈ کی گئیں، جن میں فلسطینی نوجوانوں اور شہریوں کی جانب سے فلسطینی شہروں اور دیہاتوں پر آباد کاروں کے 46 حملوں کا بہادری سے مقابلہ کرنا بھی شامل ہے۔

مرکز نے میدان میں ہونے والے 154 تصادم کے واقعات بھی مانیٹر کیے، جن میں قابض اسرائیلی افواج پر پتھراؤ کیا گیا، یہ مناظر عوامی سطح پر بڑھتی ہوئی مزاحمت اور تصادم کے دائرہ کار کی عکاسی کرتے ہیں۔

اسی مدت کے دوران 15 احتجاجی مظاہرے اور عوامی ریلیاں بھی نکالی گئیں، جن میں قابض اسرائیل کے جرائم کی مذمت کی گئی اور مزاحمت و شہداء کے ساتھ مکمل یکجہتی کا اظہار کیا گیا۔ یہ ریلیاں ایک ایسے وقت میں نکالی گئیں جب مغربی کنارے میں قابض اسرائیل اور اس کے آباد کاروں کے خلاف جدوجہد کو تیز کرنے اور انہیں نشانہ بنانے کے فلسطینی مطالبات میں مسلسل اضافہ ہو رہا ہے۔