مقبوضہ مغربی کنارہ – (روزنامہ قدس ـ آنلائن خبر رساں ادارہ) مقبوضہ مغربی کنارے کے شمالی حصے میں نابلس کے جنوب میں زعترہ چوک کے قریب سلفیت کے مشرق میں واقع یاسوف گاؤں کی اراضی پر قائم غیر قانونی یہودی بستی حفات انطون کے ملحقہ علاقے میں پیر کی شام ایک فلسطینی گاڑی کی ٹکر لگنے سے دو یہودی آباد کار زخمی ہو گئے۔
فلسطینی خبر رساں ایجنسی صفا کے مطابق اسرائیلی اخبار یدیعوت احرونوت نے بتایا کہ زخمی ہونے والے دونوں افراد کم عمر یہودی آباد کار ہیں اور واقعے کے بعد گاڑی کا ڈرائیور موقع سے بحفاظت نکلنے میں کامیاب ہو گیا۔ دوسری جانب قابض اسرائیلی فوج کے ریڈیو نے ایک عسکری ذریعے کے حوالے سے نقل کیا ہے کہ یہ واقعہ یاسوف گاؤں کے مضافات میں یہودی آباد کاروں اور فلسطینی شہریوں کے درمیان ہونے والی شدید جھڑپ کے تناظر میں پیش آیا۔
اس واقعے کے فوری بعد قابض اسرائیلی فوج نے یاسوف گاؤں کا محاصرہ کر لیا اور اس شبے کی بنیاد پر بڑے پیمانے پر تلاشی اور سرچ آپریشن شروع کر دیا کہ گاڑی کا ڈرائیور اس گاؤں کے اندر داخل ہو گیا ہے۔
یہ کارروائی مقبوضہ مغربی کنارے میں مزاحمتی سرگرمیوں اور جھڑپوں میں تیزی کے تناظر میں سامنے آئی ہے جہاں فلسطین انفارمیشن سینٹر معطی نے گذشتہ 48 گھنٹوں کے دوران 32 مزاحمتی کارروائیاں ریکارڈ کی ہیں جن کے نتیجے میں قابض صہیونی فورسز اور یہودی آباد کاروں کی صفوں میں دو افراد زخمی ہوئے۔
ریکارڈ کی گئی ان مزاحمتی کارروائیوں میں یہودی آباد کاروں کے حملوں کی مزاحمت کی دو کارروائیاں اور ان کی گاڑیوں کو نقصان پہنچانے کے دو واقعات شامل ہیں جبکہ مقبوضہ مغربی کنارے کے 28 مختلف مقامات پر قابض صہیونی فوج کے ساتھ جھڑپیں اور سنگ باری کے واقعات پیش آئے۔