نئی عسکری کشیدگی، نیتن یاہو کا جنوبی بیروت کے ضاحیہ پر بمباری کا حکم

تل ابیب – (روزنامہ قدس ـ آنلائن خبر رساں ادارہ) قابض اسرائیل کی حکومت کے سربراہ بنجمن نیتن یاھو اور وزیر جنگ یسرائيل کاٹز نے فوج کو بیروت کے جنوبی ضاحیہ پر وحشیانہ حملے کرنے کی نئی ہدایات جاری کرنے کا اعلان کیا ہے، یہ احکامات جنوبی لبنان میں جھڑپوں کے دوران ایک اسرائیلی فوجی کی ہلاکت اور کئی دوسروں کے زخمی ہونے کے اعتراف کے چند گھنٹوں بعد سامنے آئے ہیں۔

بنجمن نیتن یاھو اور یسرائيل کاٹز نے ایک مشترکہ بیان میں کہا کہ ہم نے فوج کو بیروت کے جنوبی ضاحیہ میں اہداف پر بمباری کرنے کی ہدایات جاری کر دی ہیں۔

دوسری جانب امریکی ویب سائٹ ایکسیس نے اسرائیلی حکام کے حوالے سے نقل کیا ہے کہ تل ابیب نے ٹرمپ انتظامیہ سے بیروت میں وسیع پیمانے پر بمباری اور حملے کرنے کے لیے گرین سگنل مانگا ہے، جبکہ امریکی ذرائع نے اشارہ دیا ہے کہ جنگ بندی کے لیے کی جانے والی حالیہ کوششوں کی رفتار سست پڑ گئی ہے اور ساتھ ہی یہ انتباہ بھی جاری کیا گیا ہے کہ واشنطن کی طرف سے قابض اسرائیل کو عسکری کشیدگی بڑھانے کے لیے مزید چھوٹ دی جا سکتی ہے۔

آج صبح قابض اسرائیل کی فوج نے اعتراف کیا کہ جنوبی لبنان میں جاری لڑائی کے دوران مغلان کمانڈو یونٹ کا ایک سارجنٹ ہلاک اور تین دیگر فوجی زخمی ہو گئے ہیں۔

قابض اسرائیل کے ذرائع ابلاغ بشمول یدیعوت احرونوت اور چینل 12 نے بتایا کہ یہ اسرائیلی فوجی شقیف قلعہ کے قریب واقع يحمر قصبے کے علاقے میں حزب اللہ کی طرف سے داغے گئے ایک ڈرون طیارے کے حملے میں ہلاک ہوا جس نے اسرائیلی فوجی ٹکڑی کو نشانہ بنایا تھا۔

قابض اسرائیل کی فوج نے گذشتہ روز اتوار کی صبح اعلان کیا تھا کہ اس نے تزویراتی اہمیت کے حامل شقیف قلعہ پر اپنا کنٹرول مضبوط کر لیا ہے، جو کہ ایک بلند ترین پہاڑی پر واقع ہے اور وہاں سے دریائے لیطانی اور وادی سلوقی پر مکمل نظر رکھی جا سکتی ہے۔

قابض فوج نے آج صبح جاری کردہ اپنے بیان میں بتایا کہ جنوبی لبنان میں گذشتہ دو ہفتوں کے دوران اس کے 137 افسران اور فوجی زخمی ہوئے ہیں، جبکہ مارچ کے اوائل میں لڑائی کے دوبارہ آغاز سے اب تک ہلاکتوں کی مجموعی تعداد 26 ہو گئی ہے اور 1180 زخمی ہوئے ہیں، جن میں 69 کی حالت تشویشناک اور 134 کی حالت درمیانی نوعیت کی ہے۔

بیان میں اس بات کی طرف بھی اشارہ کیا گیا کہ جنگ بندی کے اعلان کے بعد سے اب تک 14 اسرائیلی فوجی ہلاک ہو چکے ہیں جن میں سے 10 فوجی خودکش ڈرون حملوں کے نتیجے میں مارے گئے۔

میدانی سطح پر جنوبی لبنان سے داغے گئے راکٹوں اور ڈرون طیاروں کی شناخت کے بعد بالائی جلیل کے متعدد قصبوں بشمول المطلع، مرغلیوت اور المنارہ میں خطرے کے سائرن گونج اٹھے۔

اسرائیلی براڈکاسٹنگ کارپوریشن نے بتایا کہ حزب اللہ نے فجر کے وقت سے ہی شمالی اسرائیل کی طرف راکٹوں اور ڈرون طیاروں کو داغنے کا سلسلہ مسلسل جاری رکھا ہوا ہے۔

اسرائیلی فوج نے دعویٰ کیا ہے کہ اس نے اس راکٹ لانچر کو تباہ کر دیا ہے جسے گذشتہ رات طبریا کے علاقے کو نشانہ بنانے کے لیے استعمال کیا گیا تھا، اور یہ اعلان بھی کیا کہ انہوں نے لبنانی سرزمین سے آنے والے ایک مشکوک فضائی ہدف کی طرف ایک دفاعی میزائل داغا ہے۔

دوسری طرف حزب اللہ نے دو الگ الگ بیانات میں اعلان کیا ہے کہ اس نے جنوبی لبنان کی فضاؤں میں قابض اسرائیل کے ایک ہرمز 450 طرز کے ڈرون طیارے کا مقابلہ کیا ہے، اور اس کے ساتھ ہی يحمر الشقیف قصبے کے مشرقی مضافات میں قابض اسرائیل کی ایک فوجی ٹکڑی کو نشانہ بنایا ہے، اور تاکید کی ہے کہ یہ کارروائی جنگ بندی کے معاہدے کی بار بار کی جانے والی اسرائیلی خلاف ورزیوں کے جواب میں کی گئی ہے۔

اسی سیاق میں اسرائیلی فوج نے زبردستی بے دخلی کے اقدامات کا دائرہ وسیع کرتے ہوئے جنوبی لبنان کے کئی قصبوں کے باسیوں کو فوری طور پر علاقے خالی کرنے کے دھمکی آمیز انتباہات جاری کیے ہیں، جن میں صیدا کے علاقے میں واقع العاقبیہ، الزراریہ، المروانیہ، صنیبر، النجاریہ، العدوسیہ اور خربہ بصل کے علاوہ جزین کے علاقے میں واقع ملیخ اور کفر حونہ کے قصبے شامل ہیں۔

اسرائیلی جنگی طیاروں نے تول قصبے کے مضافات پر وحشیانہ غارت گری کی، اس کے علاوہ جنوبی لبنان کے دو قصبوں میفدون اور حاروف پر بھی دو فضائی حملے کیے گئے۔

لبنانی وزارتِ صحت نے گذشتہ روز اتوار کو اعلان کیا کہ گذشتہ دو مارچ سے لبنان پر ہونے والے اسرائیلی حملوں اور سفاکیت کے نتیجے میں شہداء کی کل تعداد بڑھ کر 3412 ہو گئی ہے جبکہ زخمیوں کی تعداد 10 ہزار 269 تک پہنچ چکی ہے۔

وزارت نے ایک بیان میں کہا کہ دو مارچ سے 31 مئی تک جاری رہنے والی اس وحشیانہ جارحیت کے نتیجے میں مجموعی طور پر 3412 افراد جامِ شہادت نوش کر چکے ہیں اور 10 ہزار 269 زخمی ہوئے ہیں۔

گذشتہ دو مارچ سے قابض اسرائیل نے لبنان کے خلاف اپنی وحشیانہ جارحیت کا دائرہ انتہائی وسیع کر دیا ہے، جس کے نتیجے میں ہلاکتوں اور زخمیوں کے علاوہ دس لاکھ سے زائد افراد زبردستی ہجرت پر مجبور ہوئے ہیں، اور رہائشی عمارتوں سمیت بنیادی ڈھانچے کو بڑے پیمانے پر تباہی کا سامنا کرنا پڑا ہے۔