مغربی کنارے میں آباد کار ملیشیاؤں کا تشدد، لوٹ مار اور فلسطینی املاک کی تباہی جاری

مقبوضہ مغربی کنارہ – (روزنامہ قدس ـ آنلائن خبر رساں ادارہ) مقبوضہ مغربی کنارے کے مختلف علاقوں میں یہودی آباد کاروں کی ملیشیاؤں نے شہریوں اور ان کی املاک کے خلاف اپنے حملوں اور جارحیت میں شدت پیدا کر دی ہے جس کے نتیجے میں متعدد فلسطینی شہری زخمی ہو گئے ہیں۔

نابلس کے جنوب میں یہودی آباد کاروں نے بجلی کے کھمبے چوری کر لیے اور انہیں مادما اور بورین دیہات کے قریب قائم کی گئی نئی یہودی بستی کو بجلی فراہم کرنے کے لیے استعمال کیا۔

نابلس کے جنوب میں واقع بیتا بلدہ کے علاقے الظہرہ میں پرتشدد جھڑپوں کے دوران ایک نوجوان کے زخمی ہونے کے بعد یہودی آباد کاروں نے امدادی ٹیموں کو اس تک پہنچنے سے روک دیا۔

نابلس کے مشرق میں بیت دجن بلدہ کے علاقے عقبہ پر حملے کے دوران یہودی آباد کاروں کی ملیشیاؤں نے متعدد گاڑیوں کے ٹائر پھاڑ دیے۔

رام اللہ میں یہودی آباد کاروں نے حی الطیرہ اور عین قینیا کے درمیان واقع سڑک پر لوہے کا گیٹ نصب کر دیا اور سیمنٹ کے بلاک رکھنے کی تیاری کے لیے زمین ہموار کرنے کا کام بھی شروع کر دیا۔

رام اللہ کے شمال مشرق میں المغیر گاؤں کے مغرب میں واقع فلسطینی گھروں کے قریب یہودی آباد کاروں نے ایک نئی یہودی بستی قائم کرنے کی کوشش شروع کر دی جبکہ گاؤں میں اشتعال انگیز گشت بھی کیا۔

رام اللہ کے شمال مشرق میں سہل مرج سیع روڈ پر یہودی آباد کاروں کے پتھراؤ کے نتیجے میں ایک خاتون زخمی ہوئیں اور ایک فلسطینی خاندان کی گاڑی کو نقصان پہنچا۔

یہودی آباد کاروں نے رام اللہ کے مشرق میں المغیر اور ابو فلاح دیہات کے درمیان نوجوان حیدر ابو نعیم کی گاڑی پر حملہ کیا۔

یہودی آباد کاروں نے رام اللہ کے مشرق میں الطیبہ گاؤں کے قریب کعابنہ بستی میں رہائشی مکانات کے گرد اشتعال انگیز گشت کیا۔

سنجل قصبے میں نوجوانوں نے یہودی آباد کاروں کے حملوں کا ڈٹ کر مقابلہ کیا جس کے نتیجے میں ایک یہودی آباد کار خاتون زخمی ہوئیں اور پتھراؤ سے یہودی آباد کاروں کی گاڑیوں کو نقصان پہنچا، جبکہ قابض اسرائیل کی فورسز نے بلدہ کا مکمل محاصرہ کر لیا۔

الخلیل کے جنوب میں یطا کے علاقے واد الرخیم میں شناران خاندان کے گھروں پر یہودی آباد کاروں کے حملے کے نتیجے میں تین شہری زخمی ہو گئے۔

اسی طرح یہودی آباد کاروں کی ملیشیاؤں نے الخلیل کے جنوب میں سموع بلدہ کے مشرق میں واقع خربہ الخرابہ میں چرواہوں پر بھی حملہ کیا۔

یہودی آباد کاروں کی جانب سے کی جانے والی یہ خلاف ورزیاں بیت لحم کے مشرق میں القرن المنیا کے علاقے میں شہریوں کے مکانات تک پہنچ گئیں۔

مغربی کنارہ اور مقبوضہ بیت المقدس اس وقت شہریوں اور ان کی املاک کے خلاف قابض اسرائیل کی فورسز اور یہودی آباد کاروں کی ملیشیاؤں کی طرف سے کی جانے والی خلاف ورزیوں میں تیزی دیکھ رہے ہیں، جبکہ فلسطینیوں کی جانب سے ان کے خلاف مزاحمت اور تصادم تیز کرنے کی مسلسل اپیلیں کی جا رہی ہیں۔