بیروت – (روزنامہ قدس ـ آنلائن خبر رساں ادارہ) وزارت صحت لبنان نےاعلان کیا ہے کہ گذشتہ دو مارچ سنہ 2026ء سے لبنان پر جاری قابض اسرائیل کی جارحیت کے نتیجے میں شہید ہونے والوں کی تعداد 3912 اور زخمیوں کی تعداد 11873 تک پہنچ گئی ہے۔
لبنانی وزارت صحت کے تحت کام کرنے والے ہیلتھ ایمرجنسی آپریشنز سینٹر نے جمعرات کی شام ایک بیان میں بتایا کہ دو مارچ سے اٹھارہ جون سنہ 2026ء تک کی مدت کے دوران قابض اسرائیل کی جارحیت کے مجموعی اعداد و شمار کے مطابق 3912 افراد شہید اور 11873 زخمی ہوئے ہیں۔
یہ ہلاکت خیز اعداد و شمار ایک ایسے وقت میں سامنے آئے ہیں جب قابض اسرائیل کی جانب سے جنوبی لبنان کے کئی قصبوں اور دیہاتوں پر فضائی حملے اور گولہ باری کا سلسلہ جاری ہے۔ اس کے علاوہ شہری گاڑیوں کو بھی براہ راست نشانہ بنایا جا رہا ہے۔
لبنان کی قومی خبر رساں ایجنسی نے اطلاع دی ہے کہ جنوبی لبنان میں کفر تبنیت قصبے کے قریب قابض اسرائیل کے ایک ڈرون طیارے نے ایک کار کو نشانہ بنایا، جس کے نتیجے میں ایک لبنانی شہری شہید اور دوسرا شدید زخمی ہو گیا۔
خبر رساں ایجنسی نے مزید بتایا کہ قابض اسرائیل کے ایک ڈرون طیارے نے ملک کے جنوب میں واقع قصبے بیت یحون پر بم گرایا، جس کے نتیجے میں دو افراد زخمی ہو گئے۔
لبنان کے جنوبی علاقے مسلسل کشیدگی کی زد میں ہیں، جہاں فضائی حملے، توپ خانے سے گولہ باری اور مختلف مقامات پر اہداف کو نشانہ بنانے کا سلسلہ جاری ہے، جبکہ جنوبی سرحد پر کشیدگی میں بدستور اضافہ ہو رہا ہے۔
