ٹوکیو (روزنامہ قدس ـ آنلائن خبر رساں ادارہ) جاپان نے عالمی یبنک کے توسط سے فلسطینیوں کی صحت اور تعلیم کے لیے 12 ملین ڈالر کی امداد فراہم کی ہے۔ العربیہ اردو کے مطابق جاپان کے نمائندہ دفتر کا کہنا ہے کہ یہ رقم فلسطین کے ضروری شعبوں میں کارکردگی بہتر کرنے اور غزہ جنگ کی وجہ سے بڑھے ہوئے مالی خسارے کے دوران کام آئے گی۔ بتایا گیا ہے کہ اس رقم کا تقریبا 60 فیصد حصہ صحت اور تعلیم کے شعبوں میں خرچ ہوگا، یہ دونوں شعبے بری طرح پامال ہوئے ہیں۔
ابتدائی طور پر ان شعبوں کے سٹاف کی تنخواہوں کی ادائیگی ممکن ہوسکے گی کیونکہ ان دونوں شعبوں میں سکولوں اور ہیلتھ کیئر سہولیات کے آپریشنز کا جاری رکھنا خطرے میں پڑ چکا ہے۔نمائندہ دفتر کے بیان میں کہا گیا ہے کہ جاپان کاپی ایف آر ڈی پروگرام مشکل میں گھرے طبقوں کی بحالی کی کوششوں میں مدد دیتا ہے، نیز انسانی سرمائے کے بچاؤ اور نجی شعبے کے تحفظ کے لیے کام کرتا ہے، اس لیے جاپان فلسطینیوں کے لیے ان مشکل لمحات میں مدد کے لیے کمٹمنٹ رکھتا ہے، فلسطینی اتھارٹی کی مدد جاری رکھی جائے گی۔
فلسطینی خبر رساں ادارے وفاکے مطابق یہ رقم عالمی بینک کے توسط سے متعلقہ شعبوں میں تقسیم ہوگی، صحت کے شعبے سے 8040 لوگوں کو ہسپتالوں میں علاج معالجے کی سہولت کے علاوہ ہسپتالوں کو طبی آلات ملیں گے، نیز ادویات کی سپلائی ممکن بنائی جائے گی۔یاد رہے کہ اسرائیل نے جنگ کے دوران فلسطینی اتھارٹی کے مالیات سے متعلق ترسیل کو روک رکھا ہے۔
