غزہ – (روزنامہ قدس ـ آنلائن خبر رساں ادارہ) مقبوضہ غزہ کی پٹی کے وسطی علاقے میں واقع البریج کیمپ پر ہفتے کی فجر کو قابض اسرائیلی افواج کے حملے کے نتیجے میں 6 شہری شہید ہو گئے۔
مقامی ذرائع نے بتایا کہ قابض دشمن کے طیاروں نے وسطی غزہ کے البریج کیمپ میں بلاک 9 میں واقع طیبہ فارمیسی کے قریب ایک سکیورٹی چوکی کو نشانہ بنایا جس کے نتیجے میں کم از کم 6 فلسطینی شہید اور متعدد زخمی ہو گئے۔
ذرائع کے مطابق شہداء کی شناخت علی سامی الشقرة، محمد سید ابو وطن، موسیٰ صالح، سلیم المغاری، محمد ابراہیم عبد المجید المقوس اور محمد علی المبحوح ابو الحسن کے ناموں سے ہوئی ہے۔
دریں اثنا، جنوبی غزہ کی پٹی میں خان یونس شہر کے مشرق میں واقع قصبے بنی سہیلہ کے مغربی محلے الرقب میں ایک اسرائیلی ڈرون نے پناہ گزینوں کے خیمے پر بم گرایا جس کے نتیجے میں تین شہری زخمی ہو گئے۔
خان یونس شہر کے وسطی اور مشرقی علاقوں پر اسرائیلی ٹینکوں کی شدید گولہ باری کے ساتھ ہی قابض اسرائیل کی جنگی کشتیوں نے بھی شہر کے سمندر میں فائرنگ کی۔
فجر کے وقت قابض اسرائیل کی توپ خانے نے شمالی غزہ کی پٹی میں بیت لاہیہ کے نادی کے علاقے کو بھی نشانہ بنایا۔
قابض اسرائیلی افواج نے شہر کے مشرقی اور شمالی علاقوں میں ٹینکوں سے فائرنگ کرنے کے ساتھ ساتھ غزہ شہر کے مشرق میں سویلین تنصیبات کو بھی دھماکوں سے اڑا دیا۔
اسی طرح قابض دشمن کی توپ خانے نے غزہ شہر کے مشرق میں واقع محلہ التفاح کے مشرقی حصے پر بھی گولہ باری کی۔
قابض افواج 10 اکتوبر سنہ 2025ء کو جنگ بندی کے معاہدے کے آغاز سے ہی فضائی و توپ خانے کی بمباری اور بار بار فائرنگ کے ذریعے اس کی خلاف ورزی جاری رکھے ہوئے ہیں، جس کے نتیجے میں اب تک سینکڑوں فلسطینی شہید اور زخمی ہو چکے ہیں۔
وزارت صحت کے مطابق گذشتہ 10 اکتوبر کو سیز فائر کے آغاز سے اب تک شہداء کی مجموعی تعداد 749 ہو چکی ہے، جبکہ زخمیوں کی تعداد 2,060 تک پہنچ گئی ہے، اس کے علاوہ اسی مدت کے دوران ملبے کے نیچے سے 759 شہداء کی لاشیں نکالی گئی ہیں۔
اسی تناظر میں وزارت نے واضح کیا کہ 7 اکتوبر سنہ 2023ء کو جارحیت کے آغاز سے اب تک شہداء کی مجموعی تعداد بڑھ کر 72,325 ہو گئی ہے اور زخمیوں کی تعداد 172,158 تک پہنچ چکی ہے جنہیں مختلف نوعیت کے زخم آئے ہیں۔
