تل ابیب – (روزنامہ قدس ـ آنلائن خبر رساں ادارہ) جنوبی لبنان میں مارچ سنہ 2026ء کے اوائل سے شروع ہونے والے زمینی آپریشن کے بعد سے اب تک قابض اسرائیلی فوج کے زخمی ہونے والے فوجیوں کی تعداد 690 تک پہنچ گئی ہے۔
قابض اسرائیلی فوج کی جانب سے اتوار کے روز جاری کردہ اعداد و شمار کے مطابق زخمیوں میں 42 کی حالت تشویشناک ہے جبکہ 96 درمیانے درجے کے اور 552 معمولی زخمی ہوئے ہیں، اس دوران صرف 18 اپریل اور 19 اپریل کے درمیان 24 گھنٹوں کے اندر 37 فوجی زخمی ہونے کے واقعات ریکارڈ کیے گئے۔
سرکاری اعداد و شمار نے ہلاک ہونے والے فوجیوں کی تعداد میں بھی اضافے کی تصدیق کی ہے جو اب 15 ہو گئی ہے، جن میں سے دو فوجی لبنان کے ساتھ عارضی جنگ بندی کے بعد ہلاک ہوئے۔
اپریل کا مہینہ میدانی واقعات کے اعتبار سے انتہائی اہم رہا ہے، جن میں 19 اپریل کو کفرکلا میں ایک انجینئرنگ گاڑی کو ہدف بنانے والے بم دھماکے میں ریزرو فوجی لیدور بورات کی ہلاکت اور 9 دیگر فوجیوں کا زخمی ہونا شامل ہے۔
اس سے قبل 31 مارچ کو ہونے والی براہ راست جھڑپوں میں ناحال بریگیڈ کے 4 فوجی ہلاک اور 6 زخمی ہو گئے تھے۔
یہ پیش رفت دو مارچ سنہ 2026ء سے جاری فوجی کشیدگی کا حصہ ہے جو ایک وسیع تر علاقائی تنازعہ میں تبدیل ہو چکی ہے۔ تخمینوں کے مطابق اسی عرصے کے دوران لبنان کی جانب شہری اور مزاحمت کاروں سمیت ہلاک ہونے والوں کی تعداد 2000 کے ہندسے کو عبور کر چکی ہے۔
