غزہ پر اسرائیلی فضائی حملوں کا سلسلہ جاری، متعدد شہری زخمی اور عمارتیں تباہ

غزہ – (روزنامہ قدس ـ آنلائن خبر رساں ادارہ) غزہ کی پٹی میں سیز فائر کے باوجود قابض اسرائیلی فوج کی جانب سے معاہدے کی مسلسل خلاف ورزیاں جاری ہیں، جس کے نتیجے میں ہفتے کے روز ایک خاتون اور بچی سمیت متعدد شہری گولیوں کا نشانہ بن کر زخمی ہو گئے۔ ان خلاف ورزیوں میں فضائی حملے، توپ خانے کی گولہ باری اور رہائشی عمارتوں کو دھماکوں سے اڑانے کے واقعات بھی شامل ہیں۔

طبی ذرائع نے اطلاع دی ہے کہ غزہ کی پٹی کے وسطی علاقے میں نام نہاد نٹزاریم محور کے قریب قابض افواج کی جانب سے بے گھر فلسطینیوں کے خیموں پر کی جانے والی اندھا دھند فائرنگ کے نتیجے میں ایک معصوم بچی سر میں گولی لگنے سے شدید زخمی ہو گئی۔

اسی طرح غزہ شہر کے جنوب میں واقع علاقے مغراقہ میں بھی قابض اسرائیل کی افواج نے بے گھر افراد کے خیموں پر اندھا دھند گولیاں برسائیں، جس کی زد میں آکر ایک 60 سالہ بزرگ شہری پاؤں میں گولی لگنے سے زخمی ہو گیا۔

قبل ازیں مقامی ذرائع نے بتایا کہ غزہ کی پٹی کے جنوبی شہر خان یونس کے جنوب میں واقع آسٹرین محلے کے قریب قابض افواج کی فائرنگ سے ایک خاتون زخمی ہو گئی۔

دریں اثنا، قابض دشمن کے جنگی طیاروں نے آج صبح غزہ، خان یونس اور رفح کے شہروں پر وحشیانہ فضائی غارات کیں۔

خان یونس کے مشرقی حصے میں قابض افواج نے کئی رہائشی عمارتوں کو بارود سے اڑا کر زمین بوس کر دیا، جبکہ اس دوران شہر کے مشرقی سمت میں موجود اسرائیلی فوجی گاڑیوں سے بھی شدید فائرنگ کی جاتی رہی۔

غزہ شہر کے مشرقی جانب بھی قابض طیاروں نے حملہ کیا، جبکہ حی الزیتون کے مشرقی علاقے میں اسرائیلی ٹینکوں کی جانب سے بھاری گولہ باری اور فائرنگ کا سلسلہ جاری رہا۔

علاوہ ازیں غزہ کی پٹی کے وسطی علاقے میں واقع بوریج پناہ گزین کیمپ کے مشرقی حصے میں اسرائیلی ٹینکوں نے شدید فائرنگ کی۔

رفح شہر میں بھی قابض فضائیہ نے بمباری کی، جبکہ شہر کے شمالی حصوں میں اسرائیلی فوجی گاڑیوں کی جانب سے مسلسل فائرنگ کی گئی۔

سیز فائر معاہدے کے نفاذ سے لے کر اب تک، قابض افواج اپنی بار بار کی خلاف ورزیوں کے نتیجے میں 617 فلسطینیوں کو شہید کر چکی ہیں، جن میں 194 بچے اور 84 خواتین شامل ہیں، جبکہ 1551 افراد زخمی ہوئے ہیں۔

سات اکتوبر سنہ 2023ء اکتوبر کو شروع ہونے والی فلسطینیوں کی نسل کشی کی اس ہولناک جنگ میں قابض افواج اب تک 72 ہزار سے زائد شہریوں کو شہید اور تقریباً 1 لاکھ 72 ہزار کو زخمی کر چکی ہیں، جبکہ 8 ہزار سے زائد افراد تاحال لاپتہ ہیں۔ اس سفاکیت کے نتیجے میں شہری ڈھانچے کا 90 فیصد حصہ تباہ ہو چکا ہے، جس کی تعمیرِ نو کے اخراجات کا تخمینہ اقوامِ متحدہ نے تقریباً 70 ارب ڈالر لگایا ہے۔