مقبوضہ مغربی کنارہ – (روزنامہ قدس ـ آنلائن خبر رساں ادارہ) کلب برائے اسیران نے بتایا ہے کہ قابض اسرائیلی فورسز نے مقبوضہ بیت المقدس سمیت مغربی کنارے سے کم از کم 25 مظلوم شہریوں کو گرفتار کر لیا ہے۔
کلب نے واضح کیا کہ گرفتار ہونے والوں میں طوباس، طولکرم، الخلیل، بیت لحم اور مقبوضہ بیت المقدس کی گورنریوں سے تعلق رکھنے والی پانچ خواتین شامل ہیں جبکہ غزہ کے 15 مزدوروں کو قلقیلیہ گورنری سے حراست میں لیا گیا ہے۔
کلب نے اس بات کی تصدیق کی کہ قابض اسرائیل فلسطینیوں کی نسل کشی کے آغاز سے ہی گرفتاریوں کی مہمات اور میدانی تفتیش میں تیزی سے اضافہ کر رہا ہے۔ اس کے ساتھ ہی متعدد علاقوں میں غاصب یہودی آباد کاروں کے حملوں کے باعث شہریوں کو نشانہ بنانے کے واقعات میں بھی اضافہ ہوا ہے جو ایک منظم پالیسی کا حصہ ہے جس میں فلسطینی معاشرے کے مختلف طبقات کو نشانہ بنایا جا رہا ہے اور یہ سب اجتماعی سزا اور انتقام کی ظالمانہ پالیسیوں کے زمرے میں آتا ہے۔
اسی تناظر میں کلب نے اس جانب اشارہ کیا کہ خواتین کو نشانہ بنانے کی پالیسیوں میں نمایاں اضافہ دیکھنے میں آ رہا ہے۔ گرفتاریوں کی ان مسلسل مہمات میں انہیں یرغمال بنانا، رات کے وقت ان کے گھروں پر دھاوے بولنا اور انہیں تفتیش کے سفاکانہ ہتھکنڈوں کا نشانہ بنانا شامل ہے۔ اس کے علاوہ سوشل میڈیا پر قابض اسرائیل کے نام نہاد دعوے ’اشتعال انگیزی‘ کی آڑ میں گرفتاریوں کے واقعات میں اضافہ ہو رہا ہے جو اس خطرناک پیش رفت کی نشاندہی کرتا ہے جس میں خواتین کی گرفتاری کو دباؤ اور اجتماعی سزا کے مذموم ہتھیار کے طور پر استعمال کیا جا رہا ہے۔
کلب نے مزید کہا کہ قابض حکام مغربی کنارے کے مختلف حصوں میں روزانہ کی بنیاد پر گرفتاریوں کی مہمات ایک مستقل اور منظم پالیسی کے تحت جاری رکھے ہوئے ہیں جہاں نسل کشی کے اس وحشیانہ جرم کے آغاز سے اب تک گرفتاریوں کی تعداد 24 ہزار سے تجاوز کر چکی ہے۔
یہ سنگین کشیدگی گرفتاریوں اور میدانی تفتیش کی پالیسیوں میں مسلسل وسعت کے سائے میں سامنے آئی ہے جس میں خواتین، بچوں اور رہا ہونے والے مظلوم اسیران سمیت فلسطینی معاشرے کے مختلف طبقات کو وحشیانہ انداز میں نشانہ بنایا جا رہا ہے۔
