نابلس – (روزنامہ قدس ـ آنلائن خبر رساں ادارہ) قابض اسرائیل کی فوج نے نابلس کے مشرق میں واقع قصبہ بیت دجن میں گھروں اور شیڈز کو مسمار کرنے کے دس نوٹس تھما دیے جبکہ جنین کے مشرق میں واقع گاؤں جلبون میں زیرِ تعمیر گھر بھی مسمار کر دیا گیا، جو مغربی کنارے میں فلسطینی تنصیبات کو نشانہ بنانے کی مذموم پالیسی کو مزید تیز کرنے کا حصہ ہے۔
بیت دجن کونسل کے نائب صدر توفيق الحج محمد نے بتایا کہ قابض فوج نے قصبے پر دھاوا بول کر رہائشیوں کو گھروں اور شیڈز جن میں مرغیوں کا ایک بند فارم بھی شامل ہے، کی مسماری کے دس نوٹس حوالے کیے۔ انہوں نے واضح کیا کہ نشانہ بننے والی تمام تنصیبات قصبے کے وسط اور مشرق میں واقع ہیں۔
گاؤں کونسل جلبون کے سربراہ عوني أبو الرب کے مطابق قابض فوج نے آج کے روز کے اوائل میں جنین کے مشرق میں واقع گاؤں جلبون میں خالد أبو الرب نامی شہری کے زیرِ تعمیر گھر کو بغیر اجازتِ تعمیر کا بہانہ بنا کر مسمار کر ڈالا، جس کا رقبہ تقریبا 150 مربع میٹر تھا۔
اعداد و شمار سے پتہ چلتا ہے کہ قابض فوج نے سنہ 2026ء کے پہلے نصف کے دوران تقریباً 341 مسماری کے آپریشن کیے جن کے نتیجے میں 740 تنصیبات تباہ ہو گئیں اور 923 فلسطینیوں کو نقصان پہنچا، اس کے علاوہ بے دخلی اور عدمِ اجازت کا بہانہ بنا کر مزید 254 تنصیبات کو گرانے کے نوٹس بھی جاری کیے گئے۔
