غزہ – (روزنامہ قدس ـ آنلائن خبر رساں ادارہ) قابض اسرائیل کی افواج غزہ کی پٹی میں 11 اکتوبر سنہ 2025ء کو نافذ العمل ہونے والے سیز فائر اور تھر کے معاہدے کی مسلسل 187ویں روز بھی خلاف ورزی کر رہی ہیں۔ بمباری، فائرنگ اور شہریوں کے گھروں کو بارود سے اڑانے کا سلسلہ بدستور جاری ہے جبکہ غزہ کی گزرگاہوں پر بھی عسکری پابندیاں مزید سخت کر دی گئی ہیں۔
منگل کی شام غزہ شہر کے مغرب میں واقع الشاطئ کیمپ پر قابض اسرائیل کی فضائی غارت گری کے نتیجے میں کم از کم 5 شہری شہید اور متعدد زخمی ہو گئے۔
ہمارے نامہ نگار نے اطلاع دی ہے کہ قابض اسرائیل کے ایک ڈرون طیارے نے الشاطئ کیمپ میں بجلی کے ایک جنریٹر کے قریب موجود شہریوں کے گروہ کو نشانہ بنایا جس کے نتیجے میں 5 شہداء کے جسد خاکی نکالے گئے اور کئی افراد زخمی ہوئے۔
غزہ شہر ہی میں قابض دشمن کی جانب سے پولیس کی ایک گاڑی کو نشانہ بنائے جانے کے نتیجے میں ایک بچے اور پولیس افسر سمیت 4 شہری شہید ہو گئے۔
وزارت داخلہ نے تصدیق کی ہے کہ آج دوپہر کے وقت اپنی معمول کی ڈیوٹی پر مامور الشفاء اور الدرج پولیس اسٹیشن سے وابستہ پولیس کی گاڑی پر قابض طیاروں کی بمباری سے ایک پولیس افسر اور ایک بچے سمیت تین شہری شہید ہوئے جبکہ پولیس اہلکاروں اور راہگیروں سمیت 9 افراد زخمی ہوئے جن میں سے بعض کی حالت تشویشناک ہے۔
آج صبح طبی ذرائع نے اطلاع دی کہ شمالی غزہ کی پٹی میں پراجیکٹ بیت لاہیا کے علاقے العلمی کو نشانہ بنائے جانے کے نتیجے میں ایک شہید کا جسد خاکی الشفاء ہسپتال لایا گیا ہے۔
پٹی کے جنوبی حصے میں قابض اسرائیل کے جنگی طیاروں نے خان یونس شہر کے مشرقی علاقوں میں دو الگ الگ واقعات میں شدید فائرنگ کی جس سے علاقے میں تناؤ کی صورتحال مزید سنگین ہو گئی ہے۔
اسی طرح قابض اسرائیلی فوج نے پٹی کے شمال میں واقع جبالیا پناہ گزین کیمپ کے اندر ابو زیتون کے علاقے میں شہریوں کے گھروں کو بڑے پیمانے پر بارود سے اڑانے کی کارروائیاں کیں جبکہ غزہ شہر کے مشرقی علاقوں کو توپ خانے سے نشانہ بنایا گیا۔
شہر کے جنوب مشرق میں واقع زیتون محلے اور جبالیا کیمپ کے علاقے ابو زیتون میں مکانات کو مسمار کرنے کی مزید کارروائیاں دیکھی گئیں جبکہ وسطی گورنری کی مشرقی پٹی پر تعینات عسکری گاڑیوں نے غزہ کے وسطی علاقوں کی طرف دوبارہ فائرنگ کی۔
دوسری جانب غزہ میں وزارت صحت نے اعلان کیا ہے کہ 7 اکتوبر سنہ 2023ء سے جاری اسرائیلی جارحیت کے نتیجے میں شہداء کی مجموعی تعداد 72,333 ہو گئی ہے جبکہ زخمیوں کی تعداد 172,202 تک پہنچ چکی ہے۔ وزارت نے اشارہ کیا کہ ہزاروں متاثرین اب بھی ملبے تلے اور سڑکوں پر پڑے ہیں جہاں ریسکیو ٹیموں کو ان تک پہنچنے میں شدید مشکلات کا سامنا ہے۔
