جنوبی لبنان – (روزنامہ قدس ـ آنلائن خبر رساں ادارہ) لبنانی مزاحمتی تحریک حزب اللہ کی جانب سے ہدف کو نشانہ بنانے والے خودکش ڈرونز کے ذریعے کیے جانے والے دوہرے حملوں کی نئی اور جدید حکمت عملی نے قابض اسرائیل کی فوج کے دفاعی نظام کو شدید الجھن اور بوکھلاہٹ میں مبتلا کر دیا ہے۔
عسکری تجزیہ کاروں کے مطابق حزب اللہ اب محض راکٹ حملوں پر اکتفا نہیں کر رہی بلکہ اس نے فضا سے زمین پر مار کرنے والے (خودکش) ڈرونز کا ایسا مربوط استعمال شروع کیا ہے جو قابض اسرائیل کے فضائی دفاعی نظام ’آئرن ڈوم‘ کی گرفت میں نہیں آتے۔ یہ ڈرونز انتہائی نچلی پرواز کرتے ہوئے صہیونی فوجی ٹھکانوں اور سکیورٹی تنصیبات کو نشانہ بناتے ہیں جس سے غاصب دشمن کو سنبھلنے کا موقع تک نہیں ملتا۔
رپورٹس بتاتی ہیں کہ حزب اللہ کے اس تزویراتی حملے کے طریقہ کار نے شمالی مقبوضہ فلسطین میں قابض اسرائیل کی فوجی کمانڈ کو ہائی الرٹ پر رہنے پر مجبور کر دیا ہے جبکہ سرحدی علاقوں میں مقیم صہیونی آباد کاروں کے درمیان شدید خوف و ہراس پھیل گیا ہے۔ حزب اللہ کے یہ ڈرون حملے نہ صرف جانی و مالی نقصان پہنچا رہے ہیں بلکہ صہیونی فوج کی نام نہاد ناقابل تسخیر سکیورٹی کا بھرم بھی پاش پاش کر رہے ہیں۔
فلسطینی نصب العین کی حمایت اور غزہ کی پٹی میں جاری فلسطینیوں کی نسل کشی کے جواب میں حزب اللہ کی یہ کارروائیاں غاصب صہیونی دشمن ریاست کے لیے ایک ڈراؤنا خواب بن چکی ہیں۔ ماہرین کا کہنا ہے کہ ڈرونز کے ذریعے ’ڈبل اسٹرائیک‘ یا دوہرے وار کی یہ تکنیک ثابت کرتی ہے کہ مزاحمتی محاذ نے دشمن کی سفاکیت کا مقابلہ کرنے کے لیے اپنی عسکری صلاحیتوں کو جدید خطوط پر استوار کر لیا ہے اور وہ کسی بھی جارحیت کا منہ توڑ جواب دینے کی مکمل صلاحیت رکھتا ہے۔
