الخلیل میں قابض فوج کی فائرنگ، بچہ شہید، متعدد فلسطینی زخمی

موبوضہ مغربی کنارہ – (روزنامہ قدس ـ آنلائن خبر رساں ادارہ) مقبوضہ مغربی کنارے کے جنوبی شہر الخلیل پر قابض اسرائیلی فوج کے وحشیانہ حملے کے دوران گولیوں کا نشانہ بننے والا 16 سالہ بچہ ابراہیم الخیاط زخموں کی تاب نہ لاتے ہوئے جام شہادت نوش کر گیا۔

مقامی ذرائع کے مطابق ابراہیم الخیاط اس وقت شدید زخمی ہوا جب قابض اسرائیلی فوج نے بڑی تعداد میں فوجی گاڑیوں کے ہمراہ الخلیل کے علاقے الحاووز میں دھاوا بولا۔ اس سفاکانہ حملے کے دوران غاصب فوج نے مرکزی شاہراہ بند کر دی اور دکانداروں کو کاروبار بند کرنے پر مجبور کیا جبکہ اس دوران نہتے شہریوں پر براہ راست فائرنگ کی گئی۔ ہلال احمر فلسطین نے تصدیق کی ہے کہ دو شہری زخمی ہوئے جبکہ ایک اور فلسطینی کو اغوا کر لیا گیا۔ الخلیل کے جنوب میں مسافر یطا کے مقام پر وحشی آباد کاروں نے ایک فلسطینی نوجوان کو بدترین تشدد کا نشانہ بنایا، جبکہ باروق کے علاقے میں قابض اسرائیل کی مشینوں نے فلسطینیوں کا گھر اور پانی کا کنواں مسمار کر دیا۔