مقبوضہ مغربی کنارہ – (روزنامہ قدس ـ آنلائن خبر رساں ادارہ) اسلامی تحریک مزاحمت ’حماس‘ نے مغربی کنارے میں استعماری توسیع کی تیز رفتار لہر کے خطرناک نتائج سے خبردار کیا ہے، جس کی تازہ ترین کڑی قابض حکومت کے فاشسٹ انتہا پسند وزراء اور مجرم یہودی آباد کاروں کے رہنماؤں کی شرکت سے جنین کے قریب سابقہ خالی شدہ بستی ’جانیم‘ کو دوبارہ کھولنا ہے۔
حماس نے اپنے ایک اخباری بیان میں اس بات کی تصدیق کی کہ ہماری مقبوضہ زمین پر قائم ہونے والی ہر استعماری بستی اور صہیونی چوٹی زمین کی ملکیت اور اس کی شناخت کی حقیقت کو کبھی تبدیل نہیں کر سکے گی اور الحاق، استعمار اور نقل مکانی کے تمام منصوبے کتنی ہی قربانیاں کیوں نہ دینی پڑیں ہرگز کامیاب نہیں ہوں گے، اور قابض دشمن کا پورا تکبر بھی ہمارے عوام کو ان کی زمین سے اکھاڑنے میں کبھی کامیاب نہیں ہوگا۔
جماعت نے فلسطینی قوم پر زور دیا کہ وہ اپنی استقامت اور اپنی زمین کے ساتھ وابستگی کو مزید مضبوط کریں، مزاحمت اور مقابلے کے تمام ذرائع کو فروغ دیں، قابض دشمن اور اس کے آباد کاروں کو روکے رکھیں، اور یہودکاری، ضم اور نقل مکانی کے منصوبوں کو ناکام بنانے کے لیے تمام گروہوں اور عوامی کوششوں کو متحد کریں۔
اس کے علاوہ حماس نے عالمی برادری سے بھی مطالبہ کیا کہ وہ اپنی قانونی اور سیاسی ذمہ داریاں پوری کرے، استعماری توسیع کے سیلاب کو روکنے کے لیے عملی اقدامات کرے، ہمارے عوام، ہماری زمین اور ہمارے مقدسات کے خلاف جرائم کا ارتکاب کرنے والے قابض رہنماؤں کا محاسبہ کرے۔
