غزہ – (روزنامہ قدس ـ آنلائن خبر رساں ادارہ) اسلامی تحریک مزاحمت (حماس) نے اپنے غیور عوام اور پوری امتِ مسلمہ کو عید الفطر کی مبارکباد پیش کرتے ہوئے اس عزم کا اظہار کیا ہے کہ عید کے ان ایام کو بھائی چارے، اتحاد اور یگانگت کو مستحکم کرنے کا ذریعہ بنایا جائے۔ حماس نے اپیل کی ہے کہ یہ مبارک موقع ہمارے بہادر عوام، غزہ، مغربی کنارے، القدس اور مسجد اقصیٰ کے لیے ہر قسم کی حمایت اور یکجہتی کے اظہار کا عنوان بننا چاہیے۔
حماس نے بارگاہِ الٰہی میں دعا کی کہ اللہ تعالیٰ اس ماہِ فضیل میں کی گئی عبادات، قربانیوں اور نیک اعمال کو شرفِ قبولیت عطا فرمائے۔ جماعت نے دعا کی کہ یہ عید ہم سب کے لیے اتحاد اور باہمی الفت کا پیغام لے کر آئے جو امت کے مفادات کی نگہبانی کرے اور ہمارے ملک، وسائل، امن اور استحکام کے خلاف دشمنوں کے مذموم منصوبوں کو ناکام بنانے کا سبب بنے۔ ساتھ ہی یہ ہمیں اپنے عوام کی امنگوں یعنی سرزمین کی آزادی اور واپسی کی منزل سے مزید قریب کر دے۔
حماس نے اپنے بیان میں کہا کہ ہم غزہ کی پٹی، مغربی کنارے، القدس اور مقبوضہ اندرونِ فلسطین میں اپنے عوام کے ساتھ جڑے ہوئے ہیں۔ ہم عبادات کی خوشیوں کے ساتھ ساتھ اپنی سرزمین اور مورچوں پر ثابت قدمی، پہرے داری (رباط)، حقوق و ثوابت سے تمسک اور مقدسات کے دفاع میں ان کے ساتھ برابر کے شریک ہیں۔
حماس نے فلسطین کے اندر اور باہر موجود اپنے تمام عوام سے اپیل کی کہ وہ عید الفطر کے ان ایام کو صفوں میں مزید اتحاد، باہمی تعاون اور ایثار کا ذریعہ بنائیں۔ انہوں نے مطالبہ کیا کہ اس موقع پر سرزمینِ فلسطین، القدس، قبلہ اول اور اسیران کے دفاع کے عہدِ وفا کی تجدید کی جائے تاکہ قابض اسرائیل کو شکست دے کر اپنی پاک سرزمین سے اس کے ناجائز وجود کا خاتمہ کیا جا سکے۔
بیان کے آخر میں حماس نے اپنے ان عظیم شہداء کی بلندیِ درجات کے لیے دعا کی جنہوں نے آزادی کی جدوجہد میں اپنی جانوں کے نذرانے پیش کیے۔ حماس نے اللہ تعالیٰ سے زخمیوں اور بیماروں کی جلد شفایابی اور قابض اسرائیل کی جیلوں میں قید اسیران کی جلد آزادی کی دعا کی۔ تحریک نے اس امید کا اظہار کیا کہ اللہ تعالیٰ ہمارے عوام اور امت کو جلد ہی غلبہ، نصرتِ مبین اور القدس و مسجد اقصیٰ کی آزادی کی صورت میں وہ خوشی عطا فرمائے گا جس کا وعدہ قرآن میں ہے کہ "اور اس دن اہلِ ایمان (اللہ کی نصرت پر) خوش ہوں گے”۔
