(روز نامہ قدس ۔آنلائن خبر رساں ادارہ) غیر قانونی صیہونی ریاست اسرائیل کی جانب سے بدھ کی صبح غزہ کے مشرقی علاقے التفاح میں واقع مدرسہ الکرامہ پر کی گئی بمباری کے دوران مقامی صحافی نورالدین مطر عبدہ شہید ہو گئے۔ وہ اس وقت الشرق نیوز اور ریڈیو الرأی کے نمائندے کی حیثیت سے موقع پر موجود تھے اور صیہونی جارحیت کی کوریج کر رہے تھے۔ مقامی ذرائع کے مطابق، نورالدین عبدہ کو اسرائیلی جنگی طیاروں نے براہ راست نشانہ بنایا۔
الکرامہ اسکول پر ہونے والی دو فضائی کارروائیوں کے نتیجے میں اب تک شہید ہونے والے شہریوں کی تعداد 19 ہو چکی ہے، جن میں خواتین اور بچے بھی شامل ہیں۔ نورالدین عبدہ کی شہادت کے بعد، اسرائیل کی جاری جارحیت کے دوران شہید ہونے والے صحافیوں کی مجموعی تعداد 213 تک پہنچ گئی ہے۔ سرکاری میڈیا آفس نے اس بربریت کو صحافیوں کے خلاف منظم مجرمانہ کارروائی قرار دیا ہے۔
میڈیا دفتر نے غیر قانونی صیہونی ریاست اسرائیل، امریکی حکومت اور ان کے اتحادی ممالک برطانیہ، جرمنی اور فرانس کو ان جرائم کا براہ راست ذمہ دار ٹھہراتے ہوئے عالمی صحافتی اداروں، بین الاقوامی تنظیموں اور انسانی حقوق کی تنظیموں سے مطالبہ کیا ہے کہ وہ فلسطینی صحافیوں کے قتل عام کی مذمت کریں اور ان جرائم میں ملوث عناصر کو عالمی عدالتوں کے کٹہرے میں لایا جائے۔ ساتھ ہی صحافیوں کو تحفظ دینے کے لیے فوری اور مؤثر اقدامات کا مطالبہ کیا گیا ہے۔