غزہ – (روزنامہ قدس ـ آنلائن خبر رساں ادارہ) غزہ کی وزارت صحت نے اعلان کیا ہے کہ قابض اسرائیل کی غزہ پر مسلط کی گئی جارحیت کے نتیجے میں گذشتہ 24 گھنٹوں کے دوران غزہ کے ہسپتالوں میں 15 شہدا کی لاشیں پہنچائی گئیں، جن میں دو نئے شہدا شامل ہیں جبکہ 13 شہدا کو ملبے سے نکالا گیا۔
وزارت صحت نے اپنی یومیہ رپورٹ میں بتایا کہ تاحال بڑی تعداد میں شہدا اور زخمی ملبے تلے اور سڑکوں پر دبے پڑے ہیں، جبکہ ایمبولینس اور سول ڈیفنس کے عملے کی شدید ناکامی کے باعث وہ اس لمحے تک ان تک رسائی حاصل نہیں کر پا رہے۔
وزارت صحت نے یہ بھی واضح کیا کہ ایک شہری کی موت اور ایک کے زخمی ہونے کا واقعہ عمارت گرنے کے نتیجے میں پیش آیا، جس کے بعد موسم سرما کے آغاز سے اب تک عمارتوں کے منہدم ہونے سے جاں بحق ہونے والوں کی تعداد 25 تک جا پہنچی ہے۔
وزارت صحت نے تصدیق کی کہ سیز فائر کے نفاذ کے بعد یعنی 10 اکتوبر سے اب تک شہدا کی مجموعی تعداد 449 ہو چکی ہے جبکہ زخمیوں کی مجموعی تعداد 1,246 تک پہنچ گئی ہے، اسی دوران ملبے سے نکالے گئے افراد کی مجموعی تعداد 710 ریکارڈ کی گئی ہے۔
وزارت نے مزید بتایا کہ قابض اسرائیل کی غزہ کے خلاف سفاک جارحیت کے آغاز یعنی 7 اکتوبر سنہ 2023ء سے اب تک شہدا کی مجموعی تعداد بڑھ کر 71,439 ہو گئی ہے جبکہ 171,324 فلسطینی زخمی ہو چکے ہیں، جو قابض صہیونی دشمن ریاست کی جانب سے جاری نسل کشی اور انسانیت سوز جرائم کا کھلا ثبوت ہے۔
