غزہ – (روزنامہ قدس ـ آنلائن خبر رساں ادارہ) وزارت صحت نے ہفتے کے روز اعلان کیا ہے کہ گذشتہ اڑتالیس گھنٹوں کے دوران غزہ کے ہسپتالوں میں پانچ شہداء لائے گئے ہیں، جن میں چار نئے شہداء اور ایک وہ شہید شامل ہے جس کی میت ملبے سے نکالی گئی ہے، جبکہ اس دوران 15 افراد کے زخمی ہونے کی تصدیق ہوئی ہے۔
وزارت صحت نے اپنی شماریاتی رپورٹ میں اس تلخ حقیقت کی تصدیق کی ہے کہ متاثرین کی ایک بڑی تعداد اب بھی ملبے تلے اور سڑکوں پر موجود ہے، جہاں ایمبولینس عملہ اور شہری دفاع کی ٹیمیں تاحال ان تک پہنچنے سے قاصر ہیں، جس کی وجہ میدانی حالات اور نشانہ بنائے گئے علاقوں میں نقل و حرکت کی شدید پیچیدگیاں ہیں۔
اعداد و شمار کے مطابق 10 اکتوبر سنہ 2025ء کو جنگ بندی کے اعلان کے بعد سے اب تک شہداء کی کل تعداد 850 ہوگئی ہے، اس کے علاوہ 2,433 افراد زخمی ہوئے جبکہ 770 شہداء کی میتیں ملبے سے نکالی گئی ہیں۔ اسی تناظر میں 7 اکتوبر سنہ 2023ء سے شروع ہونے والی غاصب صہیونی دشمن کی نسل کشی اور سفاکیت کے نتیجے میں شہداء کی مجموعی تعداد 72,736 اور زخمیوں کی تعداد 172,535 تک جا پہنچی ہے۔
وزارت نے مزید اشارہ کیا کہ یکم مئی سے اب تک شہداء کی تصدیقی کمیٹی کی جانب سے ڈیٹا کی تکمیل اور باقاعدہ منظوری کے بعد مجموعی اعداد و شمار میں مزید 103 شہداء کا اضافہ کیا گیا ہے، جو میدانی ڈیٹا کی تصدیق کے بعد اعداد و شمار کی مسلسل اپ ڈیٹ کے عمل کی عکاسی کرتا ہے۔
