غزہ – (روزنامہ قدس ـ آنلائن خبر رساں ادارہ) گذشتہ نصف شب کے وقت غزہ کے جنوبی محلے زیتون میں شہریوں کے ایک گروہ پر قابض اسرائیل کی وحشیانہ بمباری کے نتیجے میں دو شہری جامِ شہادت نوش کر گئے جبکہ متعدد زخمی ہوئے ہیں۔ مقامی ذرائع نے تصدیق کی ہے کہ جنوبی غزہ کے محلے زیتون میں الشافعی ہسپتال کے قریب قابض اسرائیل کی جانب سے کی گئی بمباری میں احمد عویضہ اور حسن الملح نامی دو شہری شہید اور دیگر کئی زخمی ہوئے ہیں۔
گذشتہ اتوار کی فجر کو بھی خان یونس کے علاقے مواصی کے جنوب مغرب میں بئر 19 کے گردونواح میں موجود شہریوں پر قابض اسرائیل نے تقریباً 10 منٹ کے وقفے سے دو میزائل داغے جس کے نتیجے میں 8 شہری شہید ہو گئے۔ اسی دوران خان یونس میں ہی صلاح الدین روڈ پر قابض اسرائیل کی گولی باری کے نتیجے میں ایک معصوم بچہ بھی شہید ہو گیا۔
فلسطینی وزارت صحت کے مطابق 11 اکتوبر سنہ 2025ء سے سیز فائر کے نفاذ کے بعد سے اب تک شہید ہونے والوں کی تعداد 704 تک پہنچ چکی ہے، اس کے علاوہ 1013 افراد زخمی ہوئے جبکہ 756 افراد کی لاشیں ملبے سے نکالی گئی ہیں۔ واضح رہے کہ سات اکتوبر سنہ 2023ء کو جنگ کے آغاز سے اب تک شہداء کی مجموعی تعداد 72,580 ہو چکی ہے جبکہ زخمیوں کی تعداد 172,013 تک جا پہنچی ہے، جو غاصب صہیونی دشمن کی جانب سے جاری فلسطینیوں کی نسل کشی کا واضح ثبوت ہے۔
