قابض اسرائیلی فوج کی فائرنگ سے شمالی غزہ میں بچے کی شہادت

  شمالی غزہ – (روزنامہ قدس ـ آنلائن خبر رساں ادارہ) شمالی غزہ میں قابض اسرائیلی فوج کی فائرنگ سے ایک فلسطینی بچہ شہید ہو گیا۔ یہ واقعہ سیز فائر کی مسلسل پامالیوں کے تسلسل کا حصہ ہے جو غزہ کے مظلوم عوام کے خلاف قابض دشمن کی سفاکیت کو بے نقاب کرتا ہے۔

مقامی ذرائع نے بتایا کہ شہید ہونے والے بچے کی شناخت یوسف احمد الشندغلی کے نام سے ہوئی ہے جسے شمالی غزہ کے علاقے جبالیا النزله میں قابض اسرائیلی فائرنگ کا نشانہ بنایا گیا۔

بچے یوسف الشندغلی کی شہادت کے بعد سیز فائر کے آغاز کے بعد سے شہدا کی مجموعی تعداد بڑھ کر 417 ہو گئی ہے جبکہ 1,153 فلسطینی زخمی ہو چکے ہیں۔ یہ سیز فائر 10 اکتوبر گزشتہ سال شروع ہوا تھا تاہم قابض اسرائیل کی جانب سے اس کی مسلسل خلاف ورزیاں جاری ہیں۔

نئے سال کے ابتدائی لمحات کے ساتھ ہی قابض اسرائیلی افواج نے غزہ میں جنگ بندی اور کشیدگی میں کمی کے معاہدے کی پامالیوں کا سلسلہ جاری رکھا۔ آج جمعرات یکم جنوری سنہ 2026ء کی صبح سے اب تک معاہدے کی آٹھ نئی خلاف ورزیاں ریکارڈ کی گئی ہیں۔ یہ معاہدہ عرب اور امریکی سرپرستی میں شرم الشیخ میں طے پایا تھا جو 10 اکتوبر سنہ 2025ء کو نافذ العمل ہوا۔

عینی شاہدین نے بتایا کہ قابض اسرائیلی جنگی طیاروں نے آج صبح جنوبی غزہ میں خان یونس شہر کے مشرقی علاقوں پر فضائی حملہ کیا۔ اس کے ساتھ ہی قابض اسرائیلی فوجی گاڑیوں کی جانب سے شہر کے مشرقی محلوں پر شدید فائرنگ کی گئی۔

غزہ کے جنوبی حصے میں مقامی ذرائع نے بتایا کہ قابض اسرائیلی فوجی گاڑیوں نے رفح شہر کے شمالی علاقوں میں فائرنگ کی۔ اسی دوران قابض اسرائیلی جنگی طیاروں نے شہر کے مختلف علاقوں کو نشانہ بناتے ہوئے متعدد فضائی حملے کیے۔