مقبوضہ بیت المقدس – (روزنامہ قدس ـ آنلائن خبر رساں ادارہ) قابض اسرائیلی پولیس نے مقبوضہ بیت المقدس میں مسلمانوں کے قبلہ اول اور اس کے گرد و نواح سے 8 فلسطینیوں کو گرفتار کر لیا جن میں اردن کے زیر انتظام محکمہ اوقاف کے ملازم رائد زغیر بھی شامل ہیں۔
مقبوضہ بیت المقدس میں وادی حلوہ انفارمیشن سینٹر کے وکلاء سراج ابو عرفہ اور فراس جبرینی نے تفصیلات بتاتے ہوئے واضح کیا کہ گرفتار کیے گئے فلسطینیوں میں 6 خواتین اور محکمہ اسلامی اوقاف کا ایک ملازم شامل ہے۔
وکلاء نے مزید بتایا کہ قابض اسرائیلی افواج نے ان تمام گرفتار شدگان کو مقبوضہ بیت المقدس کے قدیم شہر میں واقع القشلہ پولیس سینٹر منتقل کر دیا ہے جہاں انہیں سنگین حالات کا سامنا ہو سکتا ہے۔
گرفتاریوں کا یہ نیا سلسلہ ایک ایسے وقت میں سامنے آیا ہے جب قابض اسرائیلی پولیس نے پورے شہر میں جگہ جگہ رکاوٹیں کھڑی کر کے اور راستوں کو بند کر کے سکیورٹی کے نام پر پہلے ہی کڑے پہرے بٹھا رکھے ہیں جبکہ دوسری جانب مسجد اقصیٰ میں نماز کی ادائیگی کے لیے آنے والے فلسطینیوں کے شناختی کارڈ ضبط کرنے اور تلاشی کی آڑ میں ان کے داخلے پر غیر قانونی پابندیاں عائد کی جا رہی ہیں تاکہ مسلمانوں کو ان کے اس مقدس مقام سے دور رکھا جا سکے۔
