مقبوضہ بیت المقدس – (روزنامہ قدس ـ آنلائن خبر رساں ادارہ) قابض اسرائیلی فوج کے سخت سکیورٹی اور القدس کے پرانے شہر اور مسجد کے اطراف میں قابض فوج کی بھاری نفری کی تعیناتی کے دوران مبینہ یہودی تہوار ’یوم کپور‘ کی مناسبت سے آج پیر کی صبح 458 یہودی آباد کاروں نے مقبوضہ بیت المقدس میں مسجد اقصی کے مبارک صحنوں پر دھاوا بول دیا۔
مقامی ذرائع نے اطلاع دی ہے کہ سیکڑوں یہودی آباد کاروں نے قابض پولیس اور اس کے اسپیشل دستوں کے تحفظ میں گروہوں کی شکل میں مسجد الاقصی پر دھاوا بولا اور اس کے صحنوں میں اشتعال انگیز چکر لگائے۔
یہ دھاوے ایک ایسے وقت میں سامنے آئے ہیں جب قابض فوج نے شہر القدس میں اپنی کارروائیوں کو سخت کرتے ہوئے پرانے شہر اور مسجد اقصی کے اطراف میں پولیس اور اسپیشل یونٹس کے اراکین کی بڑی تعداد تعینات کر دی ہے، اس کے علاوہ فلسطینیوں کی نقل و حرکت پر بھی پابندیاں عائد کی گئی ہیں۔
قابض فوج نے مسجد اقصی کے دروازوں پر بھی اپنی کارروائیاں سخت کر دیں، نمازیوں کو تلاشی اور ان کے شناختی کارڈ کی جانچ پڑتال کے مراحل سے گزارا، اور مسجد تک فلسطینیوں کے پہنچنے پر پابندیاں عائد کیں، ایسے وقت میں جب اس نے یہودی آباد کاروں کو سخت سیکورٹی حصار میں اس پر دھاوا بولنے کی اجازت دی۔
یہ دھاوے یہودیوں کے نمایاں ترین تہواروں میں سے ایک نام نہاد ’یوم غفران‘ یا ’یوم کپور‘ کے ساتھ مطابقت رکھتے ہیں، جس میں یہودی مذہبی رسومات، عبادات اور روزے کا اہتمام کرتے ہیں، جبکہ آباد کار تنظیمیں مسجد الاقصی پر اپنے دھاووں کو تیز کرنے کے لیے ان مواقع کا استغلال کرتی ہیں۔
اس سے قبل اتوار کے روز یہودی تہواروں کے سیزن کے موقعے پرمسجد اقصی میں بڑے پیمانے پر دھاوا بولا گیا تھا، جس میں قابض فوج کے تحفظ میں قابض اسرائیل کے وزیرِ قومی سلامتی ایتمار بن گویر اور سیکڑوں یہودی آباد کاروں نے مسجد اقصیٰ میں گھس کرتلمودی تعلیمات کے مطابق مذہبی رسومات ادا کیں۔
یہودی تہواروں اور مناسبتوں کے دوران مسجد الاقصی پر قابض اسرائیل کے دھاوے تیز ہو جاتے ہیں، جبکہ مسجد میں نئے حقائق مسلط کرنے اور اس کی تاریخی اور قانونی حیثیت کو تبدیل کرنے کی کوششوں کے خلاف فلسطینیوں کی طرف سے خبردار کیا جا رہا ہے۔
قابض فوج اقصی کے اطراف میں موجود نمازیوں اور مرابطین پر سخت پابندیاں عائد رکھے ہوئے ہے، ایسے وقت میں جب مسلسل دھاووں کا مقابلہ کرنے کے لیے مسجد کی طرف سفر کرنے اور اس کے دفاع کی فلسطینی دعوتیں تیز ہو رہی ہیں۔
